የጌታችን፡የኢየሱስ፡ክርስቶስ፡ወንጌል፡
ቅዱስ፡ማርቆስ፡እንደ፡ጻፈው።

(ክለሳ.1.20020507)

_______________የማርቆስ፡ወንጌል፥ምዕራፍ፡1።______________
ምዕራፍ፡1፤
1፤የእግዚአብሔር፡ልጅ፡የኢየሱስ፡ክርስቶስ፡ወንጌል፡መዠመሪያ።
2-3፤እንሆ፥መንገድኽን፡የሚጠርግ፡መልክተኛዬን፡በፊትኽ፡እልካለኹ፡የጌታን፡መንገድ፡አዘጋጁ፡ጥርጊያውንም፡ አቅኑ፡እያለ፡በምድረ፡በዳ፡የሚጮኽ፡ሰው፡ድምፅ፡ተብሎ፡በነቢዩ፡በኢሳይያስ፡እንደ፡ተጻፈ፥
4፤ዮሐንስ፡በምድረ፡በዳ፡እያጠመቀ፡የንስሓንም፡ጥምቀት፡ለኀጢአት፡ስርየት፡እየሰበከ፡መጣ።
5፤የይሁዳም፡አገር፡ዅሉ፡የኢየሩሳሌምም፡ሰዎች፡ዅሉ፡ወደ፡ርሱ፡ይወጡ፡ነበር፥ኀጢአታቸውንም፡እየተናዘዙ፡በ ዮርዳኖስ፡ወንዝ፡ከርሱ፡ይጠመቁ፡ነበር።
6፤ዮሐንስም፡የግመል፡ጠጕር፡ለብሶ፡በወገቡ፡ጠፍር፡ይታጠቅ፡አንበጣና፡የበረሓ፡ማርም፡ይበላ፡ነበር።
7፤ተጐንብሼ፡የጫማውን፡ጠፍር፡መፍታት፡የማይገ፟ባ፟ኝ፡ከእኔ፡የሚበረታ፡በዃላዬ፡ይመጣል።
8፤እኔ፡በውሃ፡አጠመቅዃችኹ፡ርሱ፡ግን፡በመንፈስ፡ቅዱስ፡ያጠምቃችዃል፡እያለ፡ይሰብክ፡ነበር።
9፤በዚያ፡ወራትም፡ኢየሱስ፡ከገሊላ፡ናዝሬት፡መጥቶ፡ከዮሐንስ፡በዮርዳኖስ፡ወንዝ፡ተጠመቀ።
10፤ወዲያውም፡ከውሃው፡በወጣ፡ጊዜ፡ሰማያት፡ሲቀደዱ፡መንፈስም፡እንደ፡ርግብ፡ሲወርድበት፡አየና፦የምወድኽ፡ ልጄ፡አንተ፡ነኽ፥
11፤ባንተ፡ደስ፡ይለኛል፡የሚል፡ድምፅ፡ከሰማያት፡መጣ።
12፤ወዲያውም፡መንፈስ፡ወደ፡ምድረ፡በዳ፡አወጣው።
13፤በምድረ፡በዳም፡ከሰይጣን፡እየተፈተነ፡አርባ፡ቀን፡ሰነበተ፡ከአራዊትም፡ጋራ፡ነበረ፥መላእክቱም፡አገለገ ሉት።
14-15፤ዮሐንስም፡ዐልፎ፡ከተሰጠ፡በዃላ፡ኢየሱስ፡የእግዚአብሔርን፡መንግሥት፡ወንጌል፡እየሰበከና፦ዘመኑ፡ተፈ ጸመ፡የእግዚአብሔርም፡መንግሥት፡ቀርባለች፡ንስሓ፡ግቡ፡በወንጌልም፡እመኑ፡እያለ፡ወደ፡ገሊላ፡መጣ።
16፤በገሊላ፡ባሕርም፡አጠገብ፡ሲያልፍ፡ስምዖንን፡ወንድሙንም፡እንድርያስን፡መረባቸውን፡ወደ፡ባሕር፡ሲጥሉ፡ አየ፥ዓሣ፡አጥማጆች፡ነበሩና።
17፤ኢየሱስም፦በዃላዬ፡ኑና፡ሰዎችን፡አጥማጆች፡እንድትኾኑ፡አደርጋችዃለኹ፡አላቸው።
18፤ወዲያውም፡መረባቸውን፡ትተው፡ተከተሉት።
19፤ከዚያም፡ጥቂት፡እልፍ፡ብሎ፡የዘብዴዎስን፡ልጅ፡ያዕቆብን፡ወንድሙንም፡ዮሐንስን፡ደግሞ፡በታንኳ፡ላይ፡መ ረባቸውን፡ሲያበጁ፡አየ።
20፤ወዲያውም፡ጠራቸው፡አባታቸውንም፡ዘብዴዎስን፡ከሞያተኛዎቹ፡ጋራ፡በታንኳ፡ላይ፡ትተው፡ተከትለውት፡ኼዱ።
21፤ወደ፡ቅፍርናሖምም፡ገቡ፤ወዲያውም፡በሰንበት፡ወደ፡ምኵራብ፡ገብቶ፡አስተማረ።
22፤እንደ፡ባለሥልጣን፡ያስተምራቸው፡ነበር፡እንጂ፡እንደ፡ጻፊዎች፡አይደለምና፡በትምህርቱ፡ተገረሙ።
23፤በዚያን፡ጊዜም፡በምኵራባቸው፡ርኩስ፡መንፈስ፡ያለው፡ሰው፡ነበረ፤
24፤ርሱም፦የናዝሬቱ፡ኢየሱስ፡ሆይ፥ከአንተ፡ጋራ፡ምን፡አለን፧ልታጠፋን፡መጣኽን፧ማን፡እንደ፡ኾንኽ፡ዐውቄያ ለኹ፥የእግዚአብሔር፡ቅዱሱ፡ብሎ፡ጮኸ።
25፤ኢየሱስም፦ዝም፡በል፡ከርሱም፡ውጣ፡ብሎ፡ገሠጸው።
26፤ርኩሱም፡መንፈስ፡አንፈራገጠውና፡በታላቅ፡ድምፅ፡ጮኾ፡ከርሱ፡ወጣ።
27፤ዅሉም፦ይህ፡ምንድር፡ነው፧በሥልጣን፡ርኩሳን፡መናፍስትን፡ያዛ፟ል፤እነርሱም፡ይታዘዙለታልና፥ይህ፡ዐዲስ ፡ትምህርት፡ምንድር፡ነው፧ብለው፡እስኪጠያየቁ፡ድረስ፡አደነቁ።
28፤ዝናውም፡ወዲያው፡በየስፍራው፡ወደገሊላ፡ዙሪያ፡ዅሉ፡ወጣ።
29፤ወዲያውም፡ከምኵራብ፡ወጥቶ፡ከያዕቆብና፡ከዮሐንስ፡ጋራ፡ወደስምዖንና፡ወደእንድርያስ፡ቤት፡ገባ።
30፤የስምዖንም፡ዐማት፡በንዳድ፡ታማ፡ተኝታ፡ነበር፥ስለ፡ርሷም፡ወዲያው፡ነገሩት።
31፤ቀርቦም፡እጇን፡ይዞ፡አስነሣት፡ንዳዱም፡ወዲያው፡ለቀቃትና፡አገለገለቻቸው።
32፤ፀሓይም፡ገብቶ፡በመሸ፡ጊዜ፥የታመሙትንና፡አጋንንት፡ያደረባቸውን፡ዅሉ፡ወደ፡ርሱ፡አመጡ፤
33፤ከተማዪቱም፡ዅላ፡በደጅ፡ተሰብስባ፡ነበር።
34፤በልዩ፡ልዩ፡ደዌም፡የታመሙትን፡ብዙዎችን፡ፈወሰ፥ብዙዎችንም፡አጋንንት፡አወጣ፥አጋንንትም፡ክርስቶስ፡መ ኾኑን፡ዐውቀው፡ነበርና፥ሊናገሩ፡አልፈቀደላቸውም።
35፤ማለዳም፡ተነሥቶ፡ገና፡ሌሊት፡ሳለ፡ወጣ፡ወደ፡ምድረ፡በዳም፡ኼዶ፡በዚያ፡ጸለየ።
36፤ስምዖንና፡ከርሱ፡ጋራ፡የነበሩትም፡ገሥግሠው፡ተከተሉት፥
37፤ባገኙትም፡ጊዜ፦ዅሉ፡ይፈልጉኻል፡አሉት።
38፤ርሱም፦በዚያ፡ደግሞ፡ልሰብክ፡ወደ፡ሌላ፡ስፍራ፡በቅርብ፡ወዳሉ፡መንደሮች፡እንኺድ፡ስለዚህ፡ወጥቻለኹና፡ አላቸው።
39፤በምኵራባቸውም፡እየሰበከ፡አጋንንትንም፡እያወጣ፡ወደ፡ገሊላ፡ዅሉ፡መጣ።
40፤ለምጻምም፡ወደ፡ርሱ፡መጥቶ፡ተንበረከከና፦ብትወድስ፡ልታነጻኝ፡ትችላለኽ፡ብሎ፡ለመነው።
41፤ኢየሱስም፡ዐዘነለት፡እጁንም፡ዘርግቶ፡ዳሰሰውና፦እወዳ፟ለኹ፤ንጻ፡አለው።
42፤በተናገረም፡ጊዜ፡ለምጹ፡ወዲያው፡ለቀቀውና፡ነጻ።
43፤በብርቱም፡ተናግሮ፡ወዲያው፡አወጣው፤
44፤ለማንም፡አንዳች፡እንዳትናገር፡ተጠንቀቅ፥ነገር፡ግን፥ኼደኽ፡ራስኽን፡ለካህን፡አሳይ፡ለእነርሱም፡ምስክ ር፡እንዲኾን፡ስለ፡መንጻትኽ፡ሙሴ፡ያዘዘውን፡አቅርብ፡አለው።
45፤ርሱ፡ግን፡ሲወጣ፡ብዙ፡ሊሰብክና፡ነገሩን፡ሊያወራ፡ዠመረ፥ስለዚህም፡ኢየሱስ፡ተገልጦ፡ወደ፡ከተማ፡መግባ ት፡ወደ፡ፊት፡ተሳነው፥ነገር፡ግን፥በውጭ፡በምድረ፡በዳ፡ይኖር፡ነበር፤ከየስፍራውም፡ወደ፡ርሱ፡ይመጡ፡ነበር ።
_______________የማርቆስ፡ወንጌል፥ምዕራፍ፡2።______________
ምዕራፍ፡2፤
1፤ከጥቂት፡ቀን፡በዃላ፡ወደ፡ቅፍርናሖም፡ደግሞ፡ገብቶ፡በቤት፡እንደ፡ኾነ፡ተሰማ።
2፤በደጅ፡ያለው፡ስፍራም፡እስኪጠባ፟ቸው፡ድረስ፡ብዙ፡ሰዎች፡ተሰበሰቡ፤ቃሉንም፡ይነግራቸው፡ነበር።
3፤አራት፡ሰዎችም፡የተሸከሙትን፡ሽባ፡አመጡለት።
4፤ስለሕዝቡም፡ብዛት፡ወደ፡ርሱ፡ማቅረብ፡ቢያቅታቸው፡ርሱ፡ያለበትን፡የቤቱን፡ጣራ፡አነሡ፥ነድለውም፡ሽባው፡ የተኛበትን፡ዐልጋ፡አወረዱ።
5፤ኢየሱስም፡እምነታቸውን፡አይቶ፡ሽባውን፦አንተ፡ልጅ፥ኀጢአትኽ፡ተሰረየችልኽ፡አለው።
6፤ከጻፊዎችም፡አንዳንዶቹ፡በዚያ፡ተቀምጠው፡ነበር፡በልባቸውም፦ይህ፡ሰው፡ስለ፡ምን፡እንደዚህ፡ያለ፡ስድብ፡ ይናገራል፧
7፤ከአንዱ፡ከእግዚአብሔር፡በቀር፡ኀጢአት፡ሊያስተሰርይ፡ማን፡ይችላል፧ብለው፡ዐሰቡ።
8፤ወዲያውም፡ኢየሱስ፡በልባቸው፡እንዲህ፡እንዳሰቡ፡በመንፈስ፡ዐውቆ፡እንዲህ፡አላቸው፦በልባችኹ፡ይህን፡ስለ ፡ምን፡ታስባላችኹ፧
9፤ሽባውን፦ኀጢአትኽ፡ተሰረየችልኽ፡ከማለት፡ወይስ1ተነሣ፡ዐልጋኽንም፡ተሸከምና፡ኺድ፡ከማለት፡ማናቸው፡ይቀ ላል፧
10፤ነገር፡ግን፥ለሰው፡ልጅ፡በምድር፡ላይ፡ኀጢአትን፡ሊያስተሰርይ፡ሥልጣን፡እንዳለው፡እንድታውቁ፤
11፤ሽባውን፦አንተን፡እልኻለኹ፥ተነሣ፥ዐልጋኽን፡ተሸከምና፡ወደ፡ቤትኽ፡ኺድ፡አለው።
12፤ተነሥቶም፡ወዲያው፡ዐልጋውን፡ተሸክሞ፡በዅሉ፡ፊት፡ወጣ፥ስለዚህም፡ሰዎች፡ዅሉ፡ተገረሙና፦እንዲህ፡ያለ፡ ከቶ፡አላየንም፡ብለው፡እግዚአብሔርን፡አከበሩ።
13፤ደግሞም፡በባሕር፡አጠገብ፡ወጣ፤ሕዝቡም፡ዅሉ፡ወደ፡ርሱ፡መጡና፡አስተማራቸው።
14፤ሲያልፍም፡በመቅረጫው፡ተቀምጦ፡የነበረውን፡የእልፍዮስን፡ልጅ፡ሌዊን፡አየና፦ተከተለኝ፡አለው።ተነሥቶም ፡ተከተለው።
15፤በቤቱም፡በማእዱ፡ተቀምጦ፡ሳለ፥ብዙ፡ቀራጮችና፡ኀጢአተኛዎች፡ከኢየሱስና፡ከደቀ፡መዛሙርቱ፡ጋራ፡ተቀመጡ ፤ብዙ፡ነበሩ፡ይከተሉትም፡ነበር።
16፤ጻፊዎችና፡ፈሪሳውያንም፥ከቀራጮችና፡ከኀጢአተኛዎች፡ጋራ፡ሲበላ፡አይተው፡ለደቀ፡መዛሙርቱ፦ከቀራጮችና፡ ከኀጢአተኛዎች፡ጋራ፡የሚበላና፡የሚጠጣ፡ስለ፡ምንድር፡ነው፧አሉ።
17፤ኢየሱስም፡ሰምቶ፦ሕመምተኛዎች፡እንጂ፡ብርቱዎች፡ባለመድኀኒት፡አያስፈልጋቸውም፤ኀጢአተኛዎችን፡እንጂ፡ ጻድቃንን፡ልጠራ፡አልመጣኹም፡አላቸው።
18፤የዮሐንስ፡ደቀ፡መዛሙርትና፡ፈሪሳውያን፡ይጦሙ፡ነበር።መጥተውም፦የዮሐንስና፡የፈሪሳውያን፡ደቀ፡መዛሙር ት፡የሚጦሙት፡የአንተ፡ደቀ፡መዛሙርት፡ግን፡የማይጦሙት፡ስለ፡ምንድር፡ነው፧አሉት።
19፤ኢየሱስም፡አላቸው፦ሙሽራው፡ከነርሱ፡ጋራ፡ሳለ፡ሚዜዎች፡ሊጦሙ፡ይችላሉን፧ሙሽራው፡ከነርሱ፡ጋራ፡ሳለ፡ሊ ጦሙ፡አይችሉም።
20፤ነገር፡ግን፥ሙሽራው፡ከነርሱ፡የሚወሰድበት፡ወራት፡ይመጣል፥በዚያ፡ወራትም፡ይጦማሉ።
21፤በአረጀ፡ልብስ፡ዐዲስ፡ዕራፊ፡የሚጥፍ፡የለም፤ቢደረግ፡ግን፥ዐዲሱ፡መጣፊያ፡አሮጌውን፡ይቦጭቀዋል፥መቀደ ዱም፡የባሰ፡ይኾናል።
22፤በአረጀ፡አቍማዳም፡ዐዲስ፡የወይን፡ጠጅ፡የሚያኖር፡የለም፤ቢደረግ፡ግን፥የወይን፡ጠጁ፡አቍማዳውን፡ያፈነ ዳል፡የወይኑም፡ጠጅ፡ይፈሳል፡አቍማዳውም፡ይጠፋል፡ዐዲሱን፡የወይን፡ጠጅ፡ግን፡በዐዲስ፡አቍማዳ፡ያኖራሉ።
23፤በሰንበትም፡በዕርሻ፡መካከል፡ሲያልፍ፡ደቀ፡መዛሙርቱ፡እየኼዱ፡እሸት፡ይቀጥፉ፡ዠመር።
24፤ፈሪሳውያንም፦እንሆ፥በሰንበት፡ያልተፈቀደውን፡ስለ፡ምን፡ያደርጋሉ፧አሉት።
25፤ርሱም፦ዳዊት፡ባስፈለገውና፡በተራበ፡ጊዜ፥ርሱ፡ዐብረውት፡ከነበሩት፡ጋራ፡ያደረገውን፥
26፤አብያተር፡ሊቀ፡ካህናት፡በነበረ፡ጊዜ፡ወደእግዚአብሔር፡ቤት፡እንደ፡ገባ፥ከካህናት፡በቀር፡መብላት፡ያል ተፈቀደውን፡የመሥዋዕትን፡እንጀራ፡እንደ፡በላ፥ከርሱም፡ጋራ፡ለነበሩት፡እንደ፡ሰጣቸው፡ከቶ፡አላነበባችኹም ን፧አላቸው።
27፤ደግሞ፦ሰንበት፡ስለ፡ሰው፡ተፈጥሯል፡እንጂ፡ሰው፡ስለ፡ሰንበት፡አልተፈጠረም፤
28፤እንዲሁም፡የሰው፡ልጅ፡ለሰንበት፡እንኳ፡ጌታዋ፡ነው፡አላቸው።
_______________የማርቆስ፡ወንጌል፥ምዕራፍ፡3።______________
ምዕራፍ፡3፤
1፤ደግሞም፡ወደ፡ምኵራብ፡ገባ፥በዚያም፡እጁ፡የሰለለች፡ሰው፡ነበር፤
2፤ሊከሱትም፥በሰንበት፡ይፈውሰው፡እንደ፡ኾነ፡ይጠባበቁት፡ነበር።
3፤እጁ፡የሰለለችውንም፡ሰው፦ተነሥተኽ፡ወደ፡መካከል፡ና፡አለው።
4፤በሰንበት፡በጎ፡ማድረግ፡ተፈቅዷልን፧ወይስ፡ክፉ፧ነፍስ፡ማዳን፡ወይስ፡መግደል፧አላቸው፤እነርሱም፡ዝም፡አ ሉ።
5፤ስለልባቸውም፡ድንዛዜ፡ዐዝኖ፡ዙሪያውን፡እየተመለከተ፡በቍጣ፡አያቸው፥ሰውየውንም፦እጅኽን፡ዘርጋ፡አለው።
6፤ዘረጋትም፥እጁም፡ዳነች።ፈሪሳውያንም፡ወጥተው፡ወዲያው፡እንዴት፡አድርገው፡እንዲያጠፉት፡ከሄሮድስ፡ወገን ፡ጋራ፡ተማከሩበት።
7፤ኢየሱስም፡ከደቀ፡መዛሙርቱ፡ጋራ፡ወደ፡ባሕር፡ፈቀቅ፡አለ፤ከገሊላ፡የመጡም፡ብዙ፡ሰዎች፡ተከተሉት፤
8፤እንዴት፡ትልቅ፡ነገርም፡እንዳደረገው፡ሰምተው፡ብዙ፡ሰዎች፡ከይሁዳ፡ከኢየሩሳሌምም፡ከኤዶምያስም፡ከዮርዳ ኖስ፡ማዶም፡ከጢሮስና፡ከሲዶና፡ምድርም፡ወደ፡ርሱ፡መጡ።
9፤ሰዎቹም፡እንዳያጋፉት፡ታንኳን፡ያቈዩለት፡ዘንድ፡ደቀ፡መዛሙርቱን፡አዘዛቸው፤
10፤ብዙ፡ሰዎችን፡አድኖ፡ነበርና፥ስለዚህም፡ሥቃይ፡ያለባቸው፡ዅሉ፡እንዲዳስሱት፡ይወድቁበት፡ነበር።
11፤ርኩሳን፡መናፍስትም፡ባዩት፡ጊዜ፡በፊቱ፡ተደፍተው፦አንተ፡የእግዚአብሔር፡ልጅ፡ነኽ፡እያሉ፡ጮኹ።
12፤እንዳይገልጡትም፡በጣም፡አዘዛቸው።
13፤ወደ፡ተራራም፡ወጣ፥ራሱም፡የወደዳቸውን፡ወደ፡ርሱ፡ጠራ፥ወደ፡ርሱም፡ኼዱ።
14፤ከርሱም፡ጋራ፡እንዲኖሩና፡ለመስበክ፡እንዲልካቸው፥
15፤ድውዮችንም፡ሊፈውሱ፡አጋንንትንም፡ሊያወጡ፡ሥልጣን፡ይኾንላቸው፡ዘንድ፡ዐሥራ፡ኹለት፡አደረገ፤
16፤ስምዖንንም፡ጴጥሮስ፡ብሎ፡ሰየመው፤
17፤የዘብዴዎስንም፡ልጅ፡ያዕቆብን፡የያዕቆብንም፡ወንድም፡ዮሐንስን፡ቦአኔርጌስ፡ብሎ፡ሰየማቸው፥የነጐድጓድ ፡ልጆች፡ማለት፡ነው፤
18፤እንድርያስንም፡ፊልጶስንም፡በርተሎሜውስንም፡ማቴዎስንም፡ቶማስንም፡የእልፍዮስን፡ልጅ፡ያዕቆብንም፡ታዴ ዎስንም፡ቀነናዊውንም፡ስምዖንን፥
19፤አሳልፎ፡የሰጠውንም፡የአስቆሮቱን፡ይሁዳን።
20፤ወደ፡ቤትም፡መጡ፤እንጀራም፡መብላት፡ስንኳ፡እስኪሳናቸው፡ድረስ፡እንደ፡ገና፡ብዙ፡ሰዎች፡ተሰበሰቡ።
21፤ዘመዶቹም፡ሰምተው፦አበደ፡ብለዋልና፥ሊይዙት፡ወጡ።
22፤ከኢየሩሳሌም፡የወረዱ፡ጻፊዎችም፦ብዔል፡ዜቡል፡አለበት፤ደግሞ፦በአጋንንት፡አለቃ፡አጋንንትን፡ያወጣል፡ ብለው፡ተናገሩ።
23፤እነርሱንም፡ወደ፡ርሱ፡ጠርቶ፡በምሳሌ፡አላቸው፦ሰይጣን፡ሰይጣንን፡ሊያወጣው፡እንዴት፡ይችላል፧
24፤መንግሥትም፡ርስ፡በርሷ፡ከተለያየች፡ያች፡መንግሥት፡ልትቆም፡አትችልም፤
25፤ቤትም፡ርስ፡በርሱ፡ከተለያየ፡ያ፡ቤት፡ሊቆም፡አይችልም።
26፤ሰይጣንም፡ራሱን፡ተቃውሞ፡ከተለያየ፥መጨረሻ፡ይኾንበታል፡እንጂ፡ሊቆም፡አይችልም።
27፤ነገር፡ግን፥አስቀድሞ፡ኀይለኛውን፡ሳያስር፡ወደኀይለኛው፡ቤት፡ገብቶ፡ዕቃውን፡ሊበዘብዝ፡የሚችል፡የለም ፥ከዚያም፡ወዲያ፡ቤቱን፡ይበዘብዛል።
28፤እውነት፡እላችዃለኹ፥ለሰው፡ልጆች፡ኀጢአት፡ዅሉ፡የሚሳደቡትም፡ስድብ፡ዅሉ፡ይሰረይላቸዋል፤
29፤በመንፈስ፡ቅዱስ፡ላይ፡የሚሳደብ፡ዅሉ፡ግን፡የዘለዓለም፡ኀጢአት፡ዕዳ፡ይኾንበታል፡እንጂ፡ለዘለዓለም፡አ ይሰረይለትም።
30፤ርኩስ፡መንፈስ፡አለበት፡ይሉ፡ነበርና።
31፤እናቱና፡ወንድሞቹም፡መጡ፥በውጭም፡ቆመው፡ወደ፡ርሱ፡ልከው፡አስጠሩት።
32፤ብዙ፡ሰዎችም፡በዙሪያው፡ተቀምጠው፡ነበሩና፦እንሆ፥እናትኽ፡ወንድሞችኽም፡በውጭ፡ቆመው፡ይፈልጉኻል፡አሉ ት።
33፤መልሶም፦እናቴ፡ማን፡ናት፧ወንድሞቼስ፡እነ፡ማን፡ናቸው፧አላቸው።
34፤በዙሪያው፡ተቀምጠው፡ወደነበሩትም፡ተመለከተና፦እንሆ፥እናቴ፡ወንድሞቼም።
35፤የእግዚአብሔርን፡ፈቃድ፡የሚያደርግ፡ዅሉ፥ርሱ፡ወንድሜ፡ነው፡እኅቴም፡እናቴም፡አለ።
_______________የማርቆስ፡ወንጌል፥ምዕራፍ፡4።______________
ምዕራፍ፡4፤
1፤ደግሞም፡በባሕር፡ዳር፡ሊያስተምር፡ዠመረ።እጅግ፡ብዙ፡ሰዎችም፡ወደ፡ርሱ፡ስለ፡ተሰበሰቡ፡ርሱ፡በታንኳ፡ገ ብቶ፡በባሕር፡ላይ፡ተቀመጠ፤ሕዝቡም፡ዅሉ፡በባሕር፡ዳር፡በምድር፡ላይ፡ነበሩ።
2፤በምሳሌም፡ብዙ፡ያስተምራቸው፡ነበር፥በትምህርቱም፡አላቸው፦ስሙ።
3-4፤እንሆ፥ዘሪ፡ሊዘራ፡ወጣ።ሲዘራም፡አንዳንዱ፡በመንገድ፡ዳር፡ወደቀና፡ወፎች፡መጥተው፡በሉት።
5፤ሌላውም፡ብዙ፡መሬት፡በሌለበት፡በጭንጫ፡ላይ፡ወደቀና፡ጥልቅ፡መሬት፡ስላልነበረው፡ወዲያው፡በቀለ፤
6፤ፀሓይም፡ሲወጣ፡ጠወለገ፥ሥርም፡ስላልነበረው፡ደረቀ።
7፤ሌላውም፡በሾኽ፡መካከል፡ወደቀ፥ሾኽም፡ወጣና፡ዐነቀው፥ፍሬም፡አልሰጠም።
8፤ሌላውም፡በመልካም፡መሬት፡ላይ፡ወደቀና፡ወጥቶ፡አድጎ፡ፍሬ፡ሰጠ፥አንዱም፡ሠላሳ፡አንዱም፡ስድሳ፡አንዱም፡ መቶ፡አፈራ።
9፤የሚሰማ፡ዦሮ፡ያለው፡ይስማ፡አለ።
10፤ብቻውንም፡በኾነ፡ጊዜ፥በዙሪያው፡የነበሩት፡ከዐሥራ፡ኹለቱ፡ጋራ፡ስለ፡ምሳሌው፡ጠየቁት።
11-12፤እንዲህም፡አላቸው፦ለእናንተ፡የእግዚአብሔርን፡መንግሥት፡ምስጢር፡ማወቅ፡ተሰጥቷችዃል፤በውጭ፡ላሉት፡ ግን፥አይተው፡እንዲያዩ፡እንዳይመለከቱም፥ሰምተውም፡እንዲሰሙ፡እንዳያስተውሉም፥እንዳይመለሱ፡ኀጢአታቸውም ፡እንዳይሰረይላቸው፡ነገር፡ዅሉ፡በምሳሌ፡ይኾንባቸዋል።
13፤አላቸውም፦ይህን፡ምሳሌ፡አታውቁምን፧እንዴትስ፡ምሳሌዎቹን፡ዅሉ፡ታውቃላችኹ፧
14፤ዘሪው፡ቃሉን፡ይዘራል።ቃልም፡በተዘራበት፡በመንገድ፡ዳር፡የኾኑት፡እነዚህ፡ናቸው፥
15፤በሰሙት፡ጊዜም፡ሰይጣን፡ወዲያው፡መጥቶ፡በልባቸው፡የተዘራውን፡ቃል፡ይወስዳል።
16፤እንዲሁም፡በጭንጫ፡ላይ፡የተዘሩት፡እነዚህ፡ናቸው፥ቃሉንም፡ሰምተው፡ወዲያው፡በደስታ፡ይቀበሉታል፥
17፤ለጊዜውም፡ነው፡እንጂ፡በእነርሱ፡ሥር፡የላቸውም፥ዃላም፡በቃሉ፡ምክንያት፡መከራ፡ወይም፡ስደት፡በኾነ፡ጊ ዜ፡ወዲያው፡ይሰናከላሉ።
18፤በሾኽም፡የተዘሩት፡ሌላዎች፡ናቸው፥ቃሉን፡የሰሙት፡እነዚህ፡ናቸው፥
19፤የዚህም፡ዓለም፡ዐሳብና፡የባለጠግነት፡ማታለል፡የሌላውም፡ነገር፡ምኞት፡ገብተው፡ቃሉን፡ያንቃሉ፥የማያፈ ራም፡ይኾናል።
20፤በመልካምም፡መሬት፡የተዘሩት፡ቃሉን፡ሰምተው፡የሚቀበሉት፡አንዱም፡ሠላሳ፡አንዱም፡ስድሳ፡አንዱም፡መቶ፡ ፍሬ፡የሚያፈሩት፡እነዚህ፡ናቸው።
21፤እንዲህም፡አላቸው፦መብራትን፡ከእንቅብ፡ወይስ፡ከዐልጋ፡በታች፡ሊያኖሩት፡ያመጡታልን፧በመቅረዝ፡ላይ፡ሊ ያኖሩት፡አይደለምን፧
22፤እንዲገለጥ፡ባይኾን፡የተሰወረ፡የለምና፤ወደ፡ግልጥ፡እንዲመጣ፡እንጂ፡የተሸሸገ፡የለም።
23፤የሚሰማ፡ዦሮ፡ያለው፡ቢኖር፡ይስማ።
24፤አላቸውም፦ምን፡እንድትሰሙ፡ተጠበቁ።በምትሰፍሩበት፡መስፈሪያ፡ይሰፈርላችዃል፡ለእናንተም፡ይጨመርላችዃ ል።
25፤ላለው፡ይሰጠዋልና፤ከሌለውም፡ያው፡ያለው፡እንኳ፡ይወሰድበታል።
26፤ርሱም፡አለ፦በምድር፡ዘርን፡እንደሚዘራ፡ሰው፡የእግዚአብሔር፡መንግሥት፡እንደዚህ፡ናት፡ሌሊትና፡ቀን፡ይ ተኛልም፡ይነሣልም፥
27፤ርሱም፡እንዴት፡እንደሚኾን፡ሳያውቅ፡ዘሩ፡ይበቅላል፡ያድግማል።
28፤ምድሪቱም፡ዐውቃ፡በመዠመሪያ፡ቡቃያ፡ዃላም፡ዛላ፡ዃላም፡በዛላው፡ፍጹም፡ሰብል፡ታፈራለች።
29፤ፍሬ፡ግን፡ሲበስል፡መከር፡ደርሷልና፥ወዲያው፡ማጭድ፡ይልካል።
30፤ርሱም፡አለ፦የእግዚአብሔርን፡መንግሥት፡በምን፡እናስመስላታለን፧ወይስ፡በምን፡ምሳሌ፡እንመስላታለን፧
31፤እንደ፡ሰናፍጭ፡ቅንጣት፡ናት፥ርሷም፡በምድር፡በተዘራች፡ጊዜ፡በምድር፡ካለ፡ዘር፡ዅሉ፡ታንሳለች፤በተዘራ ችም፡ጊዜ፡ትወጣለች፡ከአትክልትም፡ዅሉ፡የምትበልጥ፡ትኾናለች፥
32፤የሰማይ፡ወፎችም፡በጥላዋ፡ሊሰፍሩ፡እስኪችሉ፡ታላላቅ፡ቅርንጫፎች፡ታደርጋለች።
33፤መስማትም፡በሚችሉበት፡መጠን፡እነዚህን፡በሚመስል፡በብዙ፡ምሳሌ፡ቃሉን፡ይነግራቸው፡ነበር፤ያለምሳሌ፡ግ ን፡አልነገራቸውም፥
34፤ለብቻቸውም፡ሲኾኑ፡ነገሩን፡ዅሉ፡ለገዛ፡ደቀ፡መዛሙርቱ፡ይፈታላቸው፡ነበር።
35፤በዚያም፡ቀን፡በመሸ፡ጊዜ፦ወደ፡ማዶ፡እንሻገር፡አላቸው።
36፤ሕዝቡንም፡ትተው፡በታንኳ፡እንዲያው፡ወሰዱት፥ሌላዎች፡ታንኳዎችም፡ከርሱ፡ጋራ፡ነበሩ።
37፤ብርቱ፡ዐውሎ፡ነፋስም፡ተነሣና፡ውሃ፡በታንኳዪቱ፡እስኪሞላ፡ድረስ፡ማዕበሉ፡በታንኳዪቱ፡ይገባ፡ነበር።
38፤ርሱም፡በስተዃላዋ፡ትራስ፡ተንተርሶ፡ተኝቶ፡ነበር፤አንቅተውም፦መምህር፡ሆይ፥ስንጠፋ፡አይገድኽምን፧አሉ ት።
39፤ነቅቶም፡ነፋሱን፡ገሠጸው፡ባሕሩንም፦ዝም፡በል፥ጸጥ፡በል፡አለው።ነፋሱም፡ተወ፥ታላቅ፡ጸጥታም፡ኾነ።
40፤እንዲህ፡የምትፈሩ፡ስለ፡ምን፡ነው፧እንዴትስ፡እምነት፡የላችኹም፧አላቸው።
41፤እጅግም፡ፈሩና፦እንግዲህ፡ነፋስም፡ባሕርም፡የሚታዘዙለት፡ይህ፡ማን፡ነው፧ተባባሉ።
_______________የማርቆስ፡ወንጌል፥ምዕራፍ፡5።______________
ምዕራፍ፡5፤
1፤ወደባሕር፡ማዶም፡ወደጌርጌሴኖን፡አገር፡መጡ።
2፤ከታንኳዪቱም፡በወጣ፡ጊዜ፥ርኩስ፡መንፈስ፡የያዘው፡ሰው፡ከመቃብር፡ወጥቶ፡ወዲያው፡ተገናኘው፤
3፤ርሱም፡በመቃብር፡ይኖር፡ነበር፥በሰንሰለትም፡ስንኳ፡ማንም፡ሊያስረው፡በዚያን፡ጊዜ፡አይችልም፡ነበር፤
4፤ብዙ፡ጊዜ፡በእግር፡ብረትና፡በሰንሰለት፡ይታሰር፡ነበርና፥ዳሩ፡ግን፡ሰንሰለቱን፡ይበጣጥስ፡እግር፡ብረቱን ም፡ይሰባብር፡ነበር፥ሊያሸንፈውም፡የሚችል፡አልነበረም፤
5፤ዅልጊዜም፡ሌሊትና፡ቀን፡በመቃብርና፡በተራራ፡ኾኖ፡ይጮኽ፡ነበር፡ሰውነቱንም፡በድንጋይ፡ይቧጭር፡ነበር።
6፤ኢየሱስንም፡ከሩቅ፡ባየ፡ጊዜ፡ሮጦ፡ሰገደለት፥
7፤በታላቅ፡ድምፅም፡እየጮኸ፦የልዑል፡እግዚአብሔር፡ልጅ፡ኢየሱስ፡ሆይ፥ከአንተ፡ጋራ፡ምን፡አለኝ፧እንዳታሠቃ የኝ፡በእግዚአብሔር፡አምልኻለኹ፡አለ፤
8፤አንተ፡ርኩስ፡መንፈስ፥ከዚህ፡ሰው፡ውጣ፡ብሎት፡ነበርና፦
9፤ስምኽ፡ማን፡ነው፧ብሎ፡ጠየቀው፦ብዙዎች፡ነንና፡ስሜ፡ሌጌዎን፡ነው፡አለው፥
10፤ከአገርም፡ውጭ፡እንዳይሰዳቸው፡አጥብቆ፡ለመነው።
11፤በዚያም፡በተራራ፡ጥግ፡ብዙ፡የዕሪያ፡መንጋ፡ይሰማራ፡ነበርና፦
12፤ወደ፡ዕሪያዎቹ፡እንድንገባ፡ስደደን፡ብለው፡ለመኑት።
13፤ኢየሱስም፡ፈቀደላቸው።ርኩሳን፡መናፍስቱም፡ወጥተው፡ወደ፡ዕሪያዎቹ፡ገቡ፥ኹለት፡ሺሕም፡የሚያኽል፡መንጋ ፡ከአፋፉ፡ወደ፡ባሕር፡ተጣደፉና፡በባሕር፡ሰጠሙ።
14፤እረኛዎቹም፡ሸሽተው፡በከተማውና፡በአገሩ፡አወሩ፤ነገሩም፡ምን፡እንደ፡ኾነ፡ለማየት፡መጡ።
15፤ወደ፡ኢየሱስም፡መጡ፥አጋንንትም፡ያደሩበትን፡ሌጌዎንም፡የነበረበትን፡ሰው፡ተቀምጦ፡ለብሶም፡ልቡም፡ተመ ልሶ፡አዩና፡ፈሩ።
16፤ያዩት፡ሰዎችም፡አጋንንት፡ላደሩበት፡ሰው፡የኾነውንና፡ስለ፡ዕሪያዎቹ፡ተረኩላቸው።
17፤ከአገራቸውም፡እንዲኼድላቸው፡ይለምኑት፡ዠመር።
18፤ወደ፡ታንኳዪቱም፡በገባ፡ጊዜ፡አጋንንት፡ዐድረውበት፡የነበረው፡ሰው፡ከርሱ፡ጋራ፡እንዲኖር፡ለመነው።
19፤ኢየሱስም፡አልፈቀደለትም፥ነገር፡ግን፦ወደ፡ቤትኽ፡በቤተ፡ሰዎችኽ፡ዘንድ፡ኼደኽ፡ጌታ፡እንዴት፡ያለ፡ታላ ቅ፡ነገር፡እንዳደረገልኽ፡እንዴትስ፡እንደ፡ማረኽ፡አውራላቸው፡አለው።
20፤ኼዶም፡ኢየሱስ፡እንዴት፡ያለ፡ታላቅ፡ነገር፡እንዳደረገለት፡ዐሥር፡ከተማ፡በሚባል፡አገር፡ይሰብክ፡ዠመር ፤ዅሉም፡ተደነቁ።
21፤ኢየሱስም፡ደግሞ፡በታንኳዪቱ፡ወደ፡ማዶ፡ከተሻገረ፡በዃላ፥ብዙ፡ሰዎች፡ወደ፡ርሱ፡ተሰበሰቡ፥በባሕርም፡አ ጠገብ፡ነበረ።
22፤ኢያኢሮስ፡የተባለ፡ከምኵራብ፡አለቃዎች፡አንዱ፡መጣ፤ባየውም፡ጊዜ፡በእግሩ፡ላይ፡ወደቀና፦
23፤ታናሺቱ፡ልጄ፡ልትሞት፡ቀርባለችና፡እንድትድንና፡በሕይወት፡እንድትኖር፡መጥተኽ፡እጅኽን፡ጫንባት፡ብሎ፡ አጥብቆ፡ለመነው።
24፤ከርሱም፡ጋራ፡ኼደ።ብዙ፡ሕዝብም፡ተከተሉት፡አጋፉትም።
25፤ከዐሥራ፡ኹለት፡ዓመትም፡ዠምሮ፡ደም፡የሚፈሳ፟ት፡ሴት፡ነበረች፥
26፤ከብዙ፡ባለመድኀኒቶችም፡ብዙ፡ተሠቃየች፤ገንዘቧንም፡ዅሉ፡ከስራ፡ባሰባት፡እንጂ፡ምንም፡አልተጠቀመችም፤
27፤የኢየሱስንም፡ወሬ፡ሰምታ፡በስተዃላው፡በሰዎች፡መካከል፡መጥታ፡ልብሱን፡ዳሰሰች።
28፤ልብሱን፡ብቻ፡የዳሰስኹ፡እንደ፡ኾነ፡እድናለኹ፡ብላለችና።
29፤ወዲያውም፡የደሟ፡ምንጭ፡ደረቀ፡ከሥቃይዋም፡እንደ፡ዳነች፡በሰውነቷ፡ዐወቀች።
30፤ወዲያውም፡ኢየሱስ፡ከርሱ፡ኀይል፡እንደ፡ወጣ፡በገዛ፡ራሱ፡ዐውቆ፡በሕዝቡ፡መካከል፡ዘወር፡ብሎ፦ልብሴን፡ የዳሰሰ፡ማን፡ነው፧አለ።
31፤ደቀ፡መዛሙርቱም፦ሕዝቡ፡ሲያጋፉኽ፡እያየኽ፦ማን፡ዳሰሰኝ፡ትላለኽን፧አሉት።
32፤ይህንም፡ያደረገችውን፡ለማየት፡ዘወር፡ብሎ፡ይመለከት፡ነበር።
33፤ሴቲቱ፡ግን፡የተደረገላትን፡ስላወቀች፥እየፈራች፡እየተንቀጠቀጠችም፥መጥታ፡በፊቱ፡ተደፋች፡እውነቱንም፡ ዅሉ፡ነገረችው።
34፤ርሱም፦ልጄ፡ሆይ፥እምነትሽ፡አድኖሻል፤በሰላም፡ኺጂ፡ከሥቃይሽም፡ተፈወሽ፡አላት።
35፤ርሱም፡ገና፡ሲናገር፡ከምኵራብ፡አለቃው፡ቤት፡ዘንድ፡የመጡት፦ልጅኽ፡ሞታለች፤ስለ፡ምን፡መምህሩን፡አኹን ፡ታደክመዋለኽ፧አሉት።
36፤ኢየሱስ፡ግን፡የተናገሩትን፡ቃል፡አድምጦ፡ለምኵራቡ፡አለቃ፦እመን፡ብቻ፡እንጂ፡አትፍራ፡አለው።
37፤ከጴጥሮስም፡ከያዕቆብም፡ከያዕቆብም፡ወንድም፡ከዮሐንስ፡በቀር፡ማንም፡እንዲከተለው፡አልፈቀደም።
38፤ወደምኵራቡ፡አለቃ፡ቤትም፡መጥቶ፡ሰዎች፡ሲንጫጩና፡ሲያለቅሱ፡ዋይታም፡ሲያበዙ፡አየ፤
39፤ገብቶም፦ስለ፡ምን፡ትንጫጫላችኹ፥ታለቅሳላችኹም፧ብላቴናዪቱ፡ተኝታለች፡እንጂ፡አልሞተችም፡አላቸው።
40፤በጣምም፡ሣቁበት።ርሱ፡ግን፡ዅሉን፡አስወጥቶ፡የብላቴናዪቱን፡አባትና፡እናትም፡ከርሱ፡ጋራ፡የነበሩትንም ፡ይዞ፡ብላቴናዪቱ፡ወዳለችበት፡ገባ።
41፤የብላቴናዪቱንም፡እጅ፡ይዞ፦ጣሊታ፡ቁሚ፡አላት፤ፍችውም፡አንቺ፡ብላቴና፡ተነሽ፡እልሻለኹ፡ነው።
42፤ብላቴናዪቱም፡የዐሥራ፡ኹለት፡ዓመት፡ልጅ፡ነበረችና፡ወዲያው፡ቆማ፡ተመላለሰች።ወዲያውም፡ታላቅ፡መገረም ፡ተገረሙ።
43፤ይህንም፡ማንም፡እንዳያውቅ፡አጥብቆ፡አዟቸው።የምትበላውን፡ስጧት፡አላቸው።
_______________የማርቆስ፡ወንጌል፥ምዕራፍ፡6።______________
ምዕራፍ፡6፤
1፤ከዚያም፡ወጥቶ፡ወደገዛ፡አገሩ፡መጣ፡ደቀ፡መዛሙርቱም፡ተከተሉት።
2፤ሰንበትም፡በኾነ፡ጊዜ፡በምኵራብ፡ያስተምር፡ዠመር፤ብዙዎችም፡ሰምተው፡ተገረሙና፦እነዚህን፡ነገሮች፡ይህ፡ ከወዴት፡አገኛቸው፧ለዚህ፡የተሰጠችው፡ጥበብ፡ምንድር፡ናት፧በእጁም፡የሚደረጉ፡እንደነዚህ፡ያሉ፡ተኣምራት፡ ምንድር፡ናቸው፧
3፤ይህስ፡ጸራቢው፡የማርያም፡ልጅ፡የያዕቆብም፡የዮሳም፡የይሁዳም፡የስምዖንም፡ወንድም፡አይደለምን፧እኅቶቹስ ፡በዚህ፡በእኛ፡ዘንድ፡አይደሉምን፧አሉ፤ይሰናከሉበትም፡ነበር።
4፤ኢየሱስም፦ነቢይ፡ከገዛ፡አገሩና፡ከገዛ፡ዘመዶቹ፡ከገዛ፡ቤቱም፡በቀር፡ሳይከበር፡አይቀርም፡አላቸው።
5፤በዚያም፡በጥቂቶች፡ድውዮች፡ላይ፡እጁን፡ጭኖ፡ከመፈወስ፡በቀር፥ተኣምር፡ሊያደርግ፡ምንም፡አልቻለም።
6፤ስላለማመናቸውም፡ተደነቀ።በመንደሮችም፡እያስተማረ፡ይዞር፡ነበር።
7፤አስራ፡ኹለቱንም፡ወደ፡ርሱ፡ጠራ፥ኹለት፡ኹለቱንም፡ይልካቸው፡ዠመር፥በርኩሳን፡መናፍስትም፡ላይ፡ሥልጣን፡ ሰጣቸው፥
8፤ለመንገድም፡ከበትር፡በቀር፡እንጀራም፡ቢኾን፡ከረጢትም፡ቢኾን፡መሐለቅም፡በመቀነታቸው፡ቢኾን፡እንዳይዙ፡ አዘዛቸው።
9፤በእግራችኹ፡ጫማ፡አድርጉ፡እንጂ፡ኹለት፡እጀ፡ጠባብ፡አትልበሱ፡አለ።
10፤በማናቸውም፡ስፍራ፡ወደ፡ቤት፡ብትገቡ፡ከዚያ፡እስክትወጡ፡ድረስ፡በዚያው፡ተቀመጡ።
11፤ከማይቀበሏችኹና፡ከማይሰሟችኹ፡ስፍራ፡ዅሉ፥ከዚያ፡ወጥታችኹ፡ምስክር፡ይኾንባቸው፡ዘንድ፡ከእግራችኹ፡በ ታች፡ያለውን፡ትቢያ፡አራግፉ።እውነት፡እላችዃለኹ፥ከዚያች፡ከተማ፡ይልቅ፡ለሰዶምና፡ለገሞራ፡በፍርድ፡ቀን፡ ይቀልላቸዋል፡አላቸው።
12፤ወጥተውም፡ንስሓ፡እንዲገቡ፡ሰበኩ፥ብዙ፡አጋንንትንም፡አወጡ፥
13፤ብዙ፡ድውዮችንም፡ዘይት፡እየቀቡ፡ፈወሷቸው።
14፤ስሙም፡ተገልጧልና፥ንጉሡ፡ሄሮድስ፡በሰማ፡ጊዜ፦መጥምቁ፡ዮሐንስ፡ከሙታን፡ተነሥቷል፡ስለዚህም፡ኀይል፡በ ርሱ፡ይደረጋል፡አለ።
15፤ሌላዎችም፦ኤልያስ፡ነው፡አሉ፤ሌላዎችም፦ከነቢያት፡እንደ፡አንዱ፡ነቢይ፡ነው፡አሉ።
16፤ሄሮድስ፡ግን፡ሰምቶ፦እኔ፡ራሱን፡ያስቈረጥኹት፡ዮሐንስ፡ይህ፡ነው፡ርሱ፡ከሙታን፡ተነሥቷል፡አለ።
17፤ሄሮድስ፡የወንድሙን፡የፊልጶስን፡ሚስት፡ሄሮድያዳን፡አግብቶ፡ነበርና፥በርሷ፡ምክንያት፡ራሱ፡ልኮ፡ዮሐን ስን፡አስይዞ፡በወህኒ፡አሳስሮት፡ነበር፤
18፤ዮሐንስ፡ሄሮድስን፦የወንድምኽ፡ሚስት፡ለአንተ፡ልትኾን፡አልተፈቀደም፡ይለው፡ነበርና።
19፤ሄሮድያዳ፡ግን፡ተቃውማው፡ልትገድለው፡ትፈልግ፡ነበር፡አልቻለችም፤
20፤ሄሮድስ፡ዮሐንስ፡ጻድቅና፡ቅዱስ፡ሰው፡እንደ፡ኾነ፡ዐውቆ፡ይፈራውና፡ይጠባበቀው፡ነበር፤ርሱንም፡ሰምቶ፡ በብዙ፡ነገር፡ያመነታ፡ነበር፤
21፤በደስታም፡ይሰማው፡ነበር።ሄሮድስም፡በተወለደበት፡ቀን፡ለመኳንንቱና፡ለሻለቃዎቹ፡ለገሊላም፡ሹማምንት፡ ግብር፡ባደረገ፡ጊዜ፡ምቹ፡ቀን፡ኾነላትና፡
22፤የሄሮድያዳ፡ልጅ፡ገብታ፡ስትዘፍን፡ሄሮድስንና፡ከርሱ፡ጋራ፡የተቀመጡትን፡ደስ፡አሠኘቻቸው።ንጉሡም፡ብላ ቴናዪቱን፦የምትወጂውን፡ዅሉ፡ለምኚኝ፡እሰጥሽማለኹ፡አላት፤
23፤የመንግሥቴ፡እኩሌታ፡ስንኳ፡ቢኾን፡የምትለምኚውን፡ዅሉ፡እሰጥሻለኹ፡ብሎ፡ማለላት።
24፤ወጥታም፡ለእናቷ፦ምን፡ልለምነው፧አለች።ርሷም፦የመጥምቁን፡የዮሐንስን፡ራስ፡አለች።
25፤ወዲያውም፡ፈጥና፡ወደ፡ንጉሡ፡ገብታ፦የመጥምቁን፡የዮሐንስን፡ራስ፡በወጭት፡አኹን፡ልትሰጠኝ፡እወዳለኹ፡ ብላ፡ለመነችው።
26፤ንጉሡም፡እጅግ፡ዐዝኖ፡ስለ፡መሐላው፡ከርሱም፡ጋራ፡ስለተቀመጡት፡ሊነሣት፡አልወደደም።
27፤ወዲያውም፡ንጉሡ፡ባለወግ፡ልኮ፡ራሱን፡እንዲያመጣ፡አዘዘው።ኼዶም፡በወህኒ፡ራሱን፡ቈረጠ፥
28፤ራሱንም፡በወጭት፡አምጥቶ፡ለብላቴናዪቱ፡ሰጣት፥ብላቴናዪቱም፡ለእናቷ፡ሰጠች።
29፤ደቀ፡መዛሙርቱም፡ሰምተው፡መጡ፡በድኑንም፡ወስደው፡ቀበሩት።
30፤ሐዋርያትም፡ወደ፡ኢየሱስ፡ተሰብስበው፡ያደረጉትንና፡ያስተማሩትን፡ዅሉ፡ነገሩት።
31፤እናንት፡ራሳችኹ፡ብቻችኹን፡ወደ፡ምድረ፡በዳ፡ኑና፡ጥቂት፡ዕረፉ፡አላቸው፤የሚመጡና፡የሚኼዱ፡ብዙዎች፡ነ በሩና፥ለመብላት፡እንኳ፡ጊዜ፡ዐጡ።
32፤በታንኳውም፡ብቻቸውን፡ወደ፡ምድረ፡በዳ፡ኼዱ።
33፤ሰዎችም፡ሲኼዱ፡አይዋቸው፡ብዙዎችም፡ዐወቋቸውና፡ከከተማዎች፡ዅሉ፡በእግር፡እየሮጡ፡ወዲያ፡ቀደሟቸው፡ወ ደ፡ርሱም፡ተሰበሰቡ።
34፤ኢየሱስም፡ወጥቶ፡ብዙ፡ሕዝብ፡አየና፡እረኛ፡እንደሌላቸው፡በጎች፡ስለ፡ነበሩ፡ዐዘነላቸው፥ብዙም፡ነገር፡ ያስተምራቸው፡ዠመር።
35፤በዚያን፡ጊዜም፡ብዙ፡ሰዓት፡ካለፈ፡በዃላ፡ደቀ፡መዛሙርቱ፡ወደ፡ርሱ፡ቀርበው፦ቦታው፡ምድረ፡በዳ፡ነው፡አ ኹንም፡መሽቷል፤
36፤የሚበሉት፡የላቸውምና፡በዙሪያ፡ወዳሉ፡ገጠሮችና፡መንደሮች፡ኼደው፡እንጀራ፡ለራሳቸው፡እንዲገዙ፡አሰናብ ታቸው፡አሉት።
37፤ርሱ፡ግን፡መልሶ፦እናንተ፡የሚበሉትን፡ስጧቸው፡አላቸው፦ኼደን፡እንጀራ፡በኹለት፡መቶ፡ዲናር፡እንግዛላቸ ውን፧እንዲበሉም፡እንስጣቸውን፧አሉት።
38፤ርሱም፦ስንት፡እንጀራ፡አላችኹ፧ኺዱና፡እዩ፡አላቸው።ባወቁም፡ጊዜ፦ዐምስት፥ኹለትም፡ዓሣ፡አሉት።
39፤ዅሉንም፡በየክፍሉ፡በለመለመ፡ሣር፡ላይ፡እንዲያስቀምጧቸው፡አዘዛቸው።
40፤መቶ፡መቶውና፡ዐምሳ፡ዐምሳው፡እየኾኑ፡በተራ፡በተራ፡ተቀመጡ።
41፤ዐምስቱንም፡እንጀራ፡ኹለቱንም፡ዓሣ፡ይዞ፡ወደ፡ሰማይ፡አሻቅቦ፡አየና፡ባረከ፥እንጀራውንም፡ቈርሶ፡እንዲ ያቀርቡላቸው፡ለደቀ፡መዛሙርቱ፡ሰጠ፥
42፤ኹለቱን፡ዓሣ፡ደግሞ፡ለዅሉ፡ከፈለ።ዅሉም፡በልተው፡ጠገቡ፤
43፤ከቍርስራሹም፡ዐሥራ፡ኹለት፡መሶብ፡የሞላ፡አነሡ፥ከዓሣውም፡ደግሞ።
44፤እንጀራውንም፡የበሉት፡ወንዶቹ፡ዐምስት፡ሺሕ፡ነበሩ።
45፤ወዲያውም፡ሕዝቡን፡ሲያሰናብት፡ሳለ፡ደቀ፡መዛሙርቱ፡በታንኳ፡ገብተው፡ወደ፡ማዶ፡ወደ፡ቤተ፡ሳይዳ፡እንዲ ቀድሙት፡ግድ፡አላቸው።
46፤ካሰናበታቸውም፡በዃላ፡ሊጸልይ፡ወደ፡ተራራ፡ወጣ።
47፤በመሸም፡ጊዜ፡ታንኳዪቱ፡በባሕር፡መካከል፡ሳለች፡ርሱ፡ብቻውን፡በምድር፡ላይ፡ነበረ።
48፤ነፋስ፡ወደ፡ፊታቸው፡ነበረና፡እየቀዘፉ፡ሲጨነቁ፡አይቶ፥ከሌሊቱ፡በአራተኛው፡ክፍል፡በባሕር፡ላይ፡እየኼ ደ፡ወደ፡እነርሱ፡መጣ፤ሊያልፋቸውም፡ይወድ፡ነበር።
49፤እነርሱ፡ግን፡በባሕር፡ላይ፡ሲኼድ፡ባዩት፡ጊዜ፡ምትሀት፡መሰላቸውና፡ጮኹ፥
50፤ዅሉ፡አይተውታልና፥ታወኩም።ወዲያውም፡ተናገራቸውና፦አይዟችኹ፤እኔ፡ነኝ፥አትፍሩ፡አላቸው።
51፤ወደ፡እነርሱም፡ወደ፡ታንኳዪቱ፡ገባ፥ነፋሱም፡ተወ፤በራሳቸውም፡ያለመጠን፡እጅግ፡ተገረሙ፤
52፤ስለ፡እንጀራው፡አላስተዋሉምና፤ነገር፡ግን፥ልባቸው፡ደንዝዞ፡ነበር።
53፤ተሻግረውም፡ወደ፡ምድር፡ወደ፡ጌንሴሬጥ፡ደረሱ፡ታንኳዪቱንም፡አስጠጉ።
54፤ከታንኳዪቱም፡ሲወጡ፡ወዲያው፡ዐውቀውት፡
55፤በዚያች፡አገር፡ዅሉ፡ዙሪያ፡ሮጡና፡ርሱ፡እንዳለ፡ወደሰሙበት፡ስፍራ፡ሕመምተኛዎችን፡በዐልጋ፡ላይ፡ያመጡ ፡ዠመር።
56፤በገባበትም፡ስፍራ፡ዅሉ፥መንደርም፡ከተማም፡ገጠርም፡ቢኾን፥በገበያ፡ድውዮችን፡ያኖሩ፡ነበር፤የልብሱንም ፡ጫፍ፡እንኳ፡ሊዳስሱ፡ይለምኑት፡ነበር፡የዳሰሱትም፡ዅሉ፡ዳኑ።
_______________የማርቆስ፡ወንጌል፥ምዕራፍ፡7።______________
ምዕራፍ፡7፤
1፤ፈሪሳውያንና፡ከጻፊዎች፡ወገን፡ከኢየሩሳሌም፡የመጡትም፡ወደ፡ርሱ፡ተሰበሰቡ።
2፤ከደቀ፡መዛሙርቱም፡አንዳንድ፡በርኩስ፡ማለት፡ባልታጠበ፡እጅ፡እንጀራ፡ሲበሉ፡አዩ።
3፤ፈሪሳውያንና፡አይሁድም፡ዅሉ፡የሽማግሌዎችን፡ወግ፡ሲጠብቁ፡እጃቸውን፡ደኅና፡አድርገው፡ሳይታጠቡ፡አይበሉ ምና፥
4፤ከገበያም፡ተመልሰው፡ካልታጠቡ፡አይበሉም፥ጽዋንም፡ማድጋንም፡የናስ፡ዕቃንም፡ዐልጋንም፡እንደ፡ማጠብ፡ሌላ ፡ነገር፡ሊጠብቁት፡የተቀበሉት፡ብዙ፡አለ።
5፤ፈሪሳውያንም፡ጻፊዎችም፦ደቀ፡መዛሙርትኽ፡እንደ፡ሽማግሌዎች፡ወግ፡ስለ፡ምን፡አይኼዱም፧ነገር፡ግን፡እጃቸ ውን፡ሳይታጠቡ፡እንጀራ፡ይበላሉ፡ብለው፡ጠየቁት።
6፤ርሱ፡ግን፡እንዲህ፡አላቸው፦ኢሳይያስ፡ስለ፡እናንተ፡ስለ፡ግብዞች፦ይህ፡ሕዝብ፡በከንፈሩ፡ያከብረኛል፡ልቡ ፡ግን፡ከእኔ፡በጣም፡የራቀ፡ነው፤
7፤የሰውም፡ሥርዐት፡የኾነ፡ትምህርት፡እያስተማሩ፡በከንቱ፡ያመልኩኛል፡ተብሎ፡እንደ፡ተጻፈ፡በእውነት፡ትንቢ ት፡ተናገረ።
8፤የእግዚአብሔርን፡ትእዛዝ፡ትታችኹ፡ጽዋን፡ማድጋንም፡እንደ፡ማጠብ፡የሰውን፡ወግ፡ትጠብቃላችኹ፥ይህንም፡የ መሰለ፡ብዙ፡ሌላ፡ነገር፡ታደርጋላችኹ።
9፤እንዲህም፡አላቸው፦ወጋችኹን፡ትጠብቁ፡ዘንድ፡የእግዚአብሔርን፡ትእዛዝ፡እጅግ፡ንቃችዃል።
10፤ሙሴ፦አባትኽንና፡እናትኽን፡አክብር፤ደግሞ፦አባቱን፡ወይም፡እናቱን፡የሰደበ፡ፈጽሞ፡ይሙት፡ብሏልና።
11፤እናንተ፡ግን፡ትላላችኹ፦ሰው፡አባቱን፡ወይም፡እናቱን፦ከእኔ፡የምትጠቀምበት፡ነገር፡ዅሉ፡ቍርባን፡ማለት ፡መባ፡ነው፡ቢል፥
12፤ለአባቱና፡ለእናቱ፡ምንም፡እንኳ፡ሊያደርግ፡ወደ፡ፊት፡አትፈቅዱለትም፤
13፤ባስተላለፋችኹትም፡ወግ፡የእግዚአብሔርን፡ቃል፡ትሽራላችኹ፤እንደዚሁም፡ይህን፡የሚመስል፡ብዙ፡ነገር፡ታ ደርጋላችኹ።
14፤ደግሞም፡ሕዝቡን፡ጠርቶ፦ዅላችኹ፡እኔን፡ስሙ፥አስተውሉም።
15፤ከሰው፡የሚወጡት፡ሰውን፡የሚያረክሱ፡ናቸው፡እንጂ፥ከሰው፡ውጭ፡የሚገባውስ፡ሊያረክሰው፡የሚችል፡ምንም፡ የለም።
16፤የሚሰማ፡ዦሮ፡ያለው፡ቢኖር፡ይስማ፡አላቸው።
17፤ከሕዝቡ፡ዘንድ፡ወደ፡ቤት፡ከገባ፡በዃላ፡ደቀ፡መዛሙርቱ፡ምሳሌውን፡ጠየቁት።
18፤ርሱም፦እናንተ፡ደግሞ፡እንደዚህ፡የማታስተውሉ፡ናችኹን፧ከውጭ፡ወደ፡ሰው፡የሚገባ፡ሊያረክሰው፡ምንም፡እ ንዳይችል፡አትመለከቱምን፧
19፤ወደ፡ሆድ፡ገብቶ፡ወደ፡እዳሪ፡ይወጣል፡እንጂ፡ወደ፡ልብ፡አይገባምና፤መብልን፡ዅሉ፡እያጠራ፡አላቸው።
20፤ርሱም፡አለ፦ከሰው፡የሚወጣው፡ሰውን፡የሚያረክስ፡ያ፡ነው።
21፤ከውስጥ፡ከሰው፡ልብ፡የሚወጣ፡ክፉ፡ዐሳብ፥
22፤ዝሙት፥መስረቅ፥መግደል፥ምንዝርነት፥መጐምዠት፥ክፋት፥ተንኰል፥መዳራት፥ምቀኝነት፥ስድብ፥ትዕቢት፥ስንፍ ና፡ናቸውና፤
23፤ይህ፡ክፉው፡ዅሉ፡ከውስጥ፡ይወጣል፡ሰውን፡ያረክሰዋል።
24፤ከዚያም፡ተነሥቶ፡ወደ፡ጢሮስና፡ወደሲዶና፡አገር፡ኼደ።ወደ፡ቤትም፡ገብቶ፡ማንም፡እንዳያውቅበት፡ወደደ፡ ሊሰወርም፡አልተቻለውም፤
25፤ወዲያው፡ግን፡ታናሺቱ፡ልጇ፡ርኩስ፡መንፈስ፡ያደረባት፡አንዲት፡ሴት፡ስለ፡ርሱ፡ሰምታ፡መጣችና፡በእግሩ፡ ላይ፡ተደፋች፡
26፤ሴቲቱም፡ግሪክ፥ትውልዷም፡ሲሮፊኒቃዊት፡ነበረች፤ከልጇ፡ጋኔን፡ያወጣላት፡ዘንድ፡ለመነችው።
27፤ኢየሱስ፡ግን፦ልጆቹ፡በፊት፡ይጠግቡ፡ዘንድ፡ተዪ፡የልጆቹን፡እንጀራ፡ይዞ፡ለቡችሎች፡መጣል፡አይገ፟ባ፟ም ና፥አላት።
28፤ርሷም፡መልሳ፦አዎን፥ጌታ፡ሆይ፥ቡችሎች፡እንኳ፡ከማእዱ፡በታች፡ኾነው፡የልጆችን፡ፍርፋሪ፡ይበላሉ፡አለች ው።
29፤ርሱም፦ስለዚህ፡ቃልሽ፡ኺጂ፡ጋኔኑ፡ከልጅሽ፡ወጥቷል፡አላት።
30፤ወደ፡ቤቷም፡ኼዳ፡ጋኔኑ፡ወጥቶ፡ልጇም፡በዐልጋ፡ላይ፡ተኝታ፡አገኘች።
31፤ደግሞም፡ከጢሮስ፡አገር፡ወጥቶ፡በሲዶና፡ዐልፎ፡ዐሥር፡ከተማ፡በሚባል፡አገር፡መካከል፡ወደገሊላ፡ባሕር፡ መጣ።
32፤ደንቈሮና፡ኰልታፋም፡የኾነ፡ሰው፡ወደ፡ርሱ፡አመጡ፥
33፤እጁንም፡ይጭንበት፡ዘንድ፡ለመኑት።ከሕዝቡም፡ለይቶ፡ለብቻው፡ወሰደው፥ጣቶቹንም፡በዦሮዎቹ፡አገባ፡እንት ፍም፡ብሎ፡ምላሱን፡ዳሰሰ፤
34፤ወደ፡ሰማይም፡አሻቅቦ፡አይቶ፡ቃተተና፦ኤፍታሕ፡አለው፥ርሱም፡ተከፈት፡ማለት፡ነው።
35፤ወዲያውም፡ዦሮዎቹ፡ተከፈቱ፡የምላሱም፡እስራት፡ተፈታ፡አጥርቶም፡ተናገረ።
36፤ለማንም፡አትንገሩ፡ብሎ፡አዘዛቸው፡እነርሱ፡ግን፡ባዘዛቸውም፡መጠን፡ይልቅ፡እጅግ፡አወሩት።
37፤ያለመጠንም፡ተገረሙና፦ዅሉን፡ደኅና፡አድርጓል፤ደንቈሮዎችም፡እንዲሰሙ፡ዲዳዎችም፡እንዲናገሩ፡ያደርጋል ፡አሉ።
_______________የማርቆስ፡ወንጌል፥ምዕራፍ፡8።______________
ምዕራፍ፡8፤
1፤በዚያ፡ወራት፡ደግሞ፡ብዙ፡ሕዝብ፡ነበረ፡የሚበሉትም፡ስለሌላቸው፡ደቀ፡መዛሙርቱን፡ጠርቶ፦
2፤ሕዝቡ፡ከእኔ፡ጋራ፡እስካኹን፡ሦስት፡ቀን፡ውለዋልና፥የሚበሉት፡ስለሌላቸው፡አዝንላቸዋለኹ፤
3፤ከነርሱም፡አንዳንዶቹ፡ከሩቅ፡መጥተዋልና፥ጦማቸውን፡ወደ፡ቤታቸው፡ባሰናብታቸው፡በመንገድ፡ይዝላሉ፡አላቸ ው።
4፤ደቀ፡መዛሙርቱም፦በዚህ፡በምድረ፡በዳ፡እንጀራ፡ከየት፡አግኝቶ፡ሰው፡እነዚህን፡ማጥገብ፡ይችላል፧ብለው፡መ ለሱለት።
5፤ርሱም፦ስንት፡እንጀራ፡አላችኹ፧ብሎ፡ጠየቃቸው፥እነርሱም፦ሰባት፡አሉት።
6፤ሕዝቡም፡በምድር፡እንዲቀመጡ፡አዘዘ።ሰባቱንም፡እንጀራ፡ይዞ፡አመሰገነ፥ቈርሶም፡እንዲያቀርቡላቸው፡ለደቀ ፡መዛሙርቱ፡ሰጠ፥ለሕዝቡም፡አቀረቡ።
7፤ጥቂትም፡ትንሽ፡ዓሣ፡ነበራቸው፤ባረከውም፡ይህንም፡ደግሞ፡እንዲያቀርቡላቸው፡አዘዘ።
8፤በሉም፡ጠገቡም፥የተረፈውንም፡ቍርስራሽ፡ሰባት፡ቅርጫት፡አነሡ።
9፤የበሉትም፡አራት፡ሺሕ፡ያኽል፡ነበሩ።
10፤አሰናበታቸውም።ወዲያውም፡ከደቀ፡መዛሙርቱ፡ጋራ፡ወደ፡ታንኳዪቱ፡ገብቶ፡ወደዳልማኑታ፡አገር፡መጣ።
11፤ፈሪሳውያንም፡ወጡና፡ሊፈትኑት፡ከሰማይ፡ምልክት፡ከርሱ፡ፈልገው፡ከርሱ፡ጋራ፡ይከራከሩ፡ዠመር።
12፤በመንፈሱም፡እጅግ፡ቃተተና፦ይህ፡ትውልድ፡ስለ፡ምን፡ምልክት፡ይፈልጋል፧እውነት፡እላችዃለኹ፥ለዚህ፡ትው ልድ፡ምልክት፡አይሰጠውም፡አለ።
13፤ትቷቸውም፡እንደ፡ገና፡ወደ፡ታንኳዪቱ፡ገብቶ፡ወደ፡ማዶ፡ኼደ።
14፤እንጀራ፡መያዝም፡ረሱ፥ለእነርሱም፡ካንድ፡እንጀራ፡በቀር፡በታንኳዪቱ፡አልነበራቸውም።
15፤ርሱም፦ተጠንቀቁ፤ከፈሪሳውያንና፡ከሄሮድስ፡ርሾ፡ተጠበቁ፡ብሎ፡አዘዛቸው።
16፤ርስ፡በርሳቸውም፦እንጀራ፡ስለሌለን፡ይኾናል፡ብለው፡ተነጋገሩ።
17፤ኢየሱስም፡ዐውቆ፡እንዲህ፡አላቸው፦እንጀራ፡ስለሌላችኹ፡ስለ፡ምን፡ትነጋገራላችኹ፧ገና፡አልተመለከታችኹ ምን፧አላስተዋላችኹምን፧
18፤ልባችኹስ፡ደንዝዟልን፧ዐይን፡ሳላችኹ፡አታዩምን፧ዦሮስ፡ሳላችኹ፡አትሰሙምን፧ትዝስ፡አይላችኹምን፧
19፤ዐምስቱን፡እንጀራ፡ለዐምስት፡ሺሕ፡በቈረስኹ፡ጊዜ፥ቍርስራሹ፡የሞላ፡ስንት፡መሶብ፡አነሣችኹ፧እነርሱም፦ ዐሥራ፡ኹለት፡አሉት።
20፤ሰባቱን፡እንጀራስ፡ለአራት፡ሺሕ፡በቈረስኹ፡ጊዜ፥ቍርስራሹ፡የሞላ፡ስንት፡ቅርጫት፡አነሣችኹ፧እነርሱም፦ ሰባት፡አሉት።
21፤ገና፡አላስተዋላችኹምን፧አላቸው።
22፤ወደ፡ቤተ፡ሳይዳም፡መጡ።ዕውርም፡አመጡለት፥እንዲዳስሰውም፡ለመኑት።
23፤ዕውሩንም፡እጁን፡ይዞ፡ከመንደር፡ውጭ፡አወጣው፥በዐይኑም፡ተፍቶበት፡እጁንም፡ጭኖበት።አንዳች፡ታያለኽን ፡ብሎ፡ጠየቀው።
24፤አሻቅቦም፦ሰዎች፡እንደ፡ዛፍ፡ሲመላለሱ፡አያለኹ፡አለ።
25፤ከዚህም፡በዃላ፡ደግሞ፡እጁን፡በዐይኑ፡ላይ፡ጫነበት፡አጥርቶም፡አየና፡ዳነም፡ከሩቅም፡ሳይቀር፡ዅሉን፡ተ መለከተ።
26፤ወደ፡ቤቱም፡ሰደደውና፦ወደ፡መንደሩ፡አትግባ፡በመንደሩም፡ለማንም፡አንዳች፡አትናገር፡አለው።
27፤ኢየሱስና፡ደቀ፡መዛሙርቱም፡በፊልጶስ፡ቂሳርያ፡ወዳሉ፡መንደሮች፡ወጡ፡በመንገድም፦ሰዎች፡እኔ፡ማን፡እን ደ፡ኾንኹ፡ይላሉ፧ብሎ፡ደቀ፡መዛሙርቱን፡ጠየቃቸው።
28፤እነርሱም፦መጥምቁ፡ዮሐንስ፥ሌላዎችም፡ኤልያስ፥ሌላዎችም፡ከነቢያት፡አንዱ፡ብለው፡ነገሩት።
29፤እናንተስ፡እኔ፡ማን፡እንደ፡ኾንኹ፡ትላላችኹ፧ብሎ፡ጠየቃቸው።ጴጥሮስም፦አንተ፡ክርስቶስ፡ነኽ፡ብሎ፡መለ ሰለት።
30፤ስለ፡ርሱም፡ለማንም፡እንዳይናገሩ፡አዘዛቸው።
31፤የሰው፡ልጅ፡ብዙ፡መከራ፡ሊቀበል፥ከሽማግሌዎችም፡ከካህናት፡አለቃዎችም፡ከጻፊዎችም፡ሊጣል፥ሊገደልም፡ከ ሦስት፡ቀንም፡በዃላ፡ሊነሣ፡እንዲገባው፡ያስተምራቸው፡ዠመር፤ቃሉንም፡ገልጦ፡ይናገር፡ነበር።
32፤ጴጥሮስም፡ወደ፡ርሱ፡ወስዶ፡ይገሥጸው፡ዠመር።
33፤ርሱ፡ግን፡ዘወር፡አለ፡ደቀ፡መዛሙርቱንም፡አይቶ፡ጴጥሮስን፡ገሠጸውና፦ወደ፡ዃላዬ፡ኺድ፥አንተ፡ሰይጣን፤ የሰውን፡እንጂ፡የእግዚአብሔርን፡ነገር፡አታስብምና፡አለው።
34፤ሕዝቡንም፡ከደቀ፡መዛሙርቱ፡ጋራ፡ጠርቶ፡እንዲህ፡አላቸው፦በዃላዬ፡ሊመጣ፡የሚወድ፡ቢኖር፥ራሱን፡ይካድ፡ መስቀሉንም፡ተሸክሞ፡ይከተለኝ።
35፤ነፍሱን፡ሊያድን፡የሚወድ፡ዅሉ፡ያጠፋታልና፥ስለ፡እኔና፡ስለ፡ወንጌል፡ነፍሱን፡የሚያጠፋ፡ዅሉ፡ግን፡ያድ ናታል።
36፤ሰው፡ዓለምን፡ዅሉ፡ቢያተርፍ፡ነፍሱንም፡ቢያጐድል፡ምን፡ይጠቅመዋል፧
37፤ሰውስ፡ስለነፍሱ፡ቤዛ፡ምን፡ይሰጣል፧
38፤በዚህም፡በዘማዊና፡በኀጢአተኛ፡ትውልድ፡መካከል፡በእኔና፡በቃሌ፡የሚያፍር፡ዅሉ፥የሰው፡ልጅ፡ደግሞ፡በአ ባቱ፡ክብር፡ከቅዱሳን፡መላእክት፡ጋራ፡በመጣ፡ጊዜ፡በርሱ፡ያፍርበታል።
_______________የማርቆስ፡ወንጌል፥ምዕራፍ፡9።______________
ምዕራፍ፡9፤
1፤እውነት፡እላችዃለኹ፥በዚህ፡ከቆሙት፡ሰዎች፡የእግዚአብሔር፡መንግሥት፡በኀይል፡ስትመጣ፡እስኪያዩ፡ድረስ፥ ሞትን፡የማይቀምሱ፡አንዳንዶች፡አሉ፡አላቸው።
2፤ከስድስት፡ቀንም፡በዃላ፡ኢየሱስ፡ጴጥሮስንና፡ያዕቆብን፡ዮሐንስንም፡ይዞ፡ወደ፡ረዥም፡ተራራ፡ብቻቸውን፡አ ወጣቸው።በፊታቸውም፡ተለወጠ፥ልብሱም፡አንጸባረቀ፤
3፤ዐጣቢም፡በምድር፡ላይ፡እንደዚያ፡ሊያነጣው፡እስከማይችል፡በጣም፡ነጭ፡ኾነ።
4፤ኤልያስና፡ሙሴም፡ታዩዋቸው፥ከኢየሱስም፡ጋራ፡ይነጋገሩ፡ነበር።
5፤ጴጥሮስም፡መልሶ፡ኢየሱስን፦መምህር፡ሆይ፥በዚህ፡መኾን፡ለእኛ፡መልካም፡ነውና፥አንድ፡ለአንተ፡አንድም፡ለ ሙሴ፡አንድም፡ለኤልያስ፡ሦስት፡ዳሶች፡እንሥራ፡አለው።
6፤እጅግ፡ስለ፡ፈሩ፡የሚለውን፡አያውቅም፡ነበር።
7፤ደመናም፡መጥቶ፡ጋረዳቸው፥ከደመናውም፦የምወደ፟ው፡ልጄ፡ይህ፡ነው፥ርሱን፡ስሙት፡የሚል፡ድምፅ፡መጣ።
8፤ድንገትም፡ዞረው፡ሲመለከቱ፡ከነርሱ፡ጋራ፡ከኢየሱስ፡ብቻ፡በቀር፡ማንንም፡አላዩም።
9፤ከተራራውም፡ሲወርዱ፡የሰው፡ልጅ፡ከሙታን፡እስኪነሣ፡ድረስ፡ያዩትን፡ለማንም፡እንዳይነግሩ፡አዘዛቸው።
10፤ቃሉንም፡ይዘው፦ከሙታን፡መነሣት፡ምንድር፡ነው፧እያሉ፡ርስ፡በርሳቸው፡ተጠያየቁ።
11፤እነርሱም፦ኤልያስ፡አስቀድሞ፡ሊመጣ፡እንዲገባው፡ጻፊዎች፡ስለ፡ምን፡ይላሉ፧ብለው፡ጠየቁት።
12፤ርሱም፡መልሶ፦ኤልያስማ፡አስቀድሞ፡ይመጣል፥ዅሉንም፡ያቀናናል፤ስለ፡ሰው፡ልጅም፡እንዴት፡ተብሎ፡ተጽፏል ፧ብዙ፡መከራ፡እንዲቀበል፡እንዲናቅም።
13፤ነገር፡ግን፥እላችዃለኹ፥ኤልያስ፡ደግሞ፡መጥቷል፥ስለ፡ርሱም፡እንደ፡ተጸፈ፡የወደዱትን፡ዅሉ፡አደረጉበት ፡አላቸው።
14፤ወደ፡ደቀ፡መዛሙርቱም፡በመጣ፡ጊዜ፥ብዙ፡ሕዝብ፡ሲከቧ፟ቸው፥ጻፊዎችም፡ከነርሱ፡ጋራ፡ሲከራከሩ፡አየ።
15፤ወዲያውም፡ሕዝቡ፡ዅሉ፡ባዩት፡ጊዜ፡ደነገጡ፥ወደ፡ርሱም፡ሮጠው፡እጅ፡ነሡት።
16፤ጻፊዎችንም፦ስለ፡ምን፡ከነርሱ፡ጋራ፡ትከራከራላችኹ፧ብሎ፡ጠየቃቸው።
17፤ከሕዝቡ፡አንዱ፡መልሶ፦መምህር፡ሆይ፥ዲዳ፡መንፈስ፡ያደረበትን፡ልጄን፡ወዳንተ፡አምጥቻለኹ፤
18፤በያዘውም፡ስፍራ፡ዅሉ፡ይጥለዋል፤ዐረፋም፡ይደፍቃል፥ጥርሱንም፡ያፋጫል፡ይደርቃልም፤እንዲያወጡለትም፡ለ ደቀ፡መዛሙርትኽ፡ነገርዃቸው፥አልቻሉምም፡አለው።
19፤ርሱም፡መልሶ፦የማታምን፡ትውልድ፡ሆይ፥እስከ፡መቼ፡ከእናንተ፡ጋራ፡እኖራለኹ፧እስከ፡መቼስ፡እታገሣችዃለ ኹ፧ወደ፡እኔ፡አምጡት፡አላቸው።
20፤ወደ፡ርሱም፡አመጡት።ርሱንም፡ባየ፡ጊዜ፡ያ፡መንፈስ፡ወዲያው፡አንፈራገጠው፤ወደ፡ምድርም፡ወድቆ፡ዐረፋ፡ እየደፈቀ፡ተንፈራፈረ።
21፤አባቱንም፦ይህ፡ከያዘው፡ስንት፡ዘመን፡ነው፧ብሎ፡ጠየቀው።ርሱም፦ከሕፃንነቱ፡ዠምሮ፡ነው፤
22፤ብዙ፡ጊዜም፡ሊያጠፋው፡ወደ፡እሳትም፡ወደ፡ውሃም፡ጣለው፤ቢቻልኽ፡ግን፡ዕዘንልን፥ርዳንም፡አለው።
23፤ኢየሱስም፦ቢቻልኽ፡ትላለኽ፤ለሚያምን፡ዅሉ፡ይቻላል፡አለው።
24፤ወዲያውም፡የብላቴናው፡አባት፡ጮኾ፦አምናለኹ፤አለማመኔን፡ርዳው፡አለ።
25፤ኢየሱስም፡ሕዝቡ፡እንደ፡ገና፡ሲራወጥ፡አይቶ፡ርኩሱን፡መንፈስ፡ገሠጸና፦አንተ፡ዲዳ፡ደንቈሮም፡መንፈስ፥ እኔ፡አዝኻለኹ፥ከርሱ፡ውጣ፡እንግዲህም፡አትግባበት፡አለው።
26፤ጮኾም፡እጅግም፡አንፈራግጦት፡ወጣ፤ብዙዎችም፦ሞተ፡እስኪሉ፡ድረስ፡እንደ፡ሙት፡ኾነ።
27፤ኢየሱስ፡ግን፡እጁን፡ይዞ፡አስነሣው፡ቆመም።
28፤ወደ፡ቤትም፡ከገባ፡በዃላ፡ደቀ፡መዛሙርቱ፦እኛ፡ልናወጣው፡ያልቻልን፡ስለ፡ምንድር፡ነው፧ብለው፡ብቻውን፡ ጠየቁት።
29፤ይህ፡ወገን፡በጸሎትና፡በጦም፡ካልኾነ፡በምንም፡ሊወጣ፡አይችልም፡አላቸው።
30-31፤ከዚያም፡ወጥተው፡በገሊላ፡በኩል፡ዐለፉ፤ደቀ፡መዛሙርቱንም፡ያስተምር፡ስለ፡ነበር፡ማንም፡ያውቅ፡ዘንድ ፡አልወደደም፤ለእነርሱም፦የሰው፡ልጅ፡በሰዎች፡እጅ፡ዐልፎ፡ይሰጣል፥ይገድሉትማል፥ተገድሎም፡በሦስተኛው፡ቀ ን፡ይነሣል፡ይላቸው፡ነበር።
32፤እነርሱም፡ነገሩን፡አላስተዋሉም፥እንዳይጠይቁትም፡ፈሩ።
33፤ወደ፡ቅፍርናሖምም፡መጣ።በቤትም፡ኾኖ፦በመንገድ፡ርስ፡በርሳችኹ፡ምን፡ተነጋገራችኹ፧ብሎ፡ጠየቃቸው።
34፤እነርሱ፡ግን፡በመንገድ፦ከዅሉ፡የሚበልጥ፡ማን፡ይኾን፧ተባብለው፡ነበርና፥ዝም፡አሉ።
35፤ተቀምጦም፡ዐሥራ፡ኹለቱን፡ጠርቶ፦ሰው፡ፊተኛ፡ሊኾን፡ቢወድ፡ከዅሉ፡በዃላ፡የዅሉም፡አገልጋይ፡ይኹን፡አላ ቸው።
36፤ሕፃንም፡ይዞ፡በመካከላቸው፡አቆመው፡ዐቅፎም።
37፤እንደዚህ፡ካሉ፡ሕፃናት፡አንዱን፡በስሜ፡የሚቀበል፡ዅሉ፡እኔን፡ይቀበላል፤የሚቀበለኝም፡ዅሉ፡የላከኝን፡ እንጂ፡እኔን፡አይቀበልም፡አላቸው።
38፤ዮሐንስ፡መልሶ፦መምህር፡ሆይ፥አንድ፡ሰው፡በስምኽ፡አጋንንትን፡ሲያወጣ፡አየነው፥
39፤ስለማይከተለንም፡ከለከልነው፡አለው።ኢየሱስ፡ግን፡አለ፦በስሜ፡ተኣምር፡ሠርቶ፡በቶሎ፡በእኔ፡ላይ፡ክፉ፡ መናገር፡የሚችል፡ማንም፡የለምና፡አትከልክሉት፤
40፤የማይቃወመን፡ርሱ፡ከእኛ፡ጋራ፡ነውና።
41፤የክርስቶስ፡ስለ፡ኾናችኹ፡በስሜ፡ጽዋ፡ውሃ፡የሚያጠጣችኹ፡ዅሉ፥ዋጋው፡እንዳይጠፋበት፡እውነት፡እላችዃለ ኹ።
42፤በእኔም፡ከሚያምኑት፡ከነዚህ፡ከታናናሾቹ፡አንዱን፡የሚያሰናክል፡ዅሉ፡ትልቅ፡የወፍጮ፡ድንጋይ፡በዐንገቱ ፡ታስሮ፡ወደ፡ባሕር፡ቢጣል፡ይሻለው፡ነበር።
43-44፤እጅኽ፡ብታሰናክልኽ፡ቍረጣት፤ኹለት፡እጅ፡ኖሮኽ፡ትላቸው፡ወደማይሞትበት፡እሳቱም፡ወደማይጠፋበት፡ወደ ፡ገሃነም፡ወደማይጠፋ፡እሳት፡ከመኼድ፡ጕንድሽ፡ኾነኽ፡ወደ፡ሕይወት፡መግባት፡ይሻላል።
45-46፤እግርኽ፡ብታሰናክልኽ፡ቍረጣት፤ኹለት፡እግር፡ኖሮኽ፡ትላቸው፡ወደማይሞትበት፡እሳቱም፡ወደማይጠፋበት፡ ወደ፡ገሃነም፡ወደማይጠፋ፡እሳት፡ከመጣል፡ዐንካሳ፡ኾነኽ፡ወደ፡ሕይወት፡መግባት፡ይሻልኻል።
47-48፤ዐይንኽ፡ብታሰናክልኽ፡አውጣት፤ኹለት፡ዐይን፡ኖሮኽ፡ትላቸው፡ወደማይሞትበት፡እሳቱም፡ወደማይጠፋበት፡ ወደ፡ገሃነመ፡እሳት፡ከመጣል፡አንዲት፡ዐይን፡ኖራኽ፡ወደእግዚአብሔር፡መንግሥት፡መግባት፡ይሻልኻል።
49፤ሰው፡ዅሉ፡በእሳት፡ይቀመማልና፥መሥዋዕትም፡ዅሉ፡በጨው፡ይቀመማል።
50፤ጨው፡መልካም፡ነው፤ጨው፡ግን፡ዐልጫ፡ቢኾን፡በምን፡ታጣፍጡታላችኹ፧በነፍሳችኹ፡ጨው፡ይኑርባችኹ፥ርስ፡በ ርሳችኹም፡ተስማሙ።
_______________የማርቆስ፡ወንጌል፥ምዕራፍ፡10።______________
ምዕራፍ፡10፤
1፤ከዚያም፡ተነሥቶ፡በዮርዳኖስ፡ማዶ፡ወደይሁዳ፡አገር፡መጣ፥ደግሞም፡ብዙ፡ሰዎች፡ወደ፡ርሱ፡ተሰበሰቡ፡እንደ ፡ልማዱም፡ደግሞ፡ያስተምራቸው፡ነበር።
2፤ፈሪሳውያንም፡ቀርበው፦ሰው፡ሚስቱን፡ሊፈታ፡ተፈቅዶለታልን፧ብለው፡ሊፈትኑት፡ጠየቁት።
3፤ርሱ፡ግን፡መልሶ፦ሙሴ፡ምን፡አዘዛችኹ፧አላቸው።
4፤እነርሱም፦ሙሴስ፡የፍቿን፡ጽሕፈት፡ጽፎ፡እንዲፈታት፡ፈቀደ፡አሉ።
5፤ኢየሱስም፡መልሶ፡እንዲህ፡አላቸው፦ስለልባችኹ፡ጥንካሬ፡ይህችን፡ትእዛዝ፡ጻፈላችኹ።
6፤ከፍጥረት፡መዠመሪያ፡ግን፡እግዚአብሔር፡ወንድና፡ሴት፡አደረጋቸው፤
7፤ስለዚህ፥ሰው፡አባቱንና፡እናቱን፡ይተዋል፥ከሚስቱም፡ጋራ፡ይተባበራል፥
8፤ኹለቱም፡አንድ፡ሥጋ፡ይኾናሉ፤ስለዚህ፥አንድ፡ሥጋ፡ናቸው፡እንጂ፡ወደ፡ፊት፡ኹለት፡አይደሉም።
9፤እግዚአብሔር፡ያጣመረውን፡እንግዲህ፡ሰው፡አይለየው።
10፤በቤትም፡ደግሞ፡ደቀ፡መዛሙርቱ፡ስለዚህ፡ነገር፡ጠየቁት።
11፤ርሱም፦ሚስቱን፡ፈቶ፟፡ሌላ፡የሚያገባ፡ዅሉ፡በርሷ፡ላይ፡ያመነዝራል፤
12፤ርሷም፡ባሏን፡ፈታ፟፡ሌላ፡ብታገባ፡ታመነዝራለች፡አላቸው።
13፤እንዲዳስሳቸውም፡ሕፃናትን፡ወደ፡ርሱ፡አመጡ፤ደቀ፡መዛሙርቱም፡ያመጧቸውን፡ገሠጿቸው።
14፤ኢየሱስ፡ግን፡አይቶ፡ተቈጣና፦ሕፃናትን፡ወደ፡እኔ፡ይመጡ፡ዘንድ፡ተዉ፥አትከልክሏቸው፤የእግዚአብሔር፡መ ንግሥት፡እንደነዚህ፡ላሉት፡ናትና።
15፤እውነት፡እላችዃለኹ፤የእግዚአብሔርን፡መንግሥት፡እንደ፡ሕፃን፡የማይቀበላት፡ዅሉ፡ከቶ፡አይገባባትም፡አ ላቸው።
16፤ዐቀፋቸውም፡እጁንም፡ጭኖ፡ባረካቸው።
17፤ርሱም፡በመንገድ፡ሲወጣ፡አንድ፡ሰው፡ወደ፡ርሱ፡ሮጦ፡ተንበረከከለትና፦ቸር፡መምህር፡ሆይ፥የዘለዓለም፡ሕ ይወትን፡እወርስ፡ዘንድ፡ምን፡ላድርግ፧ብሎ፡ጠየቀው።
18፤ኢየሱስም፦ስለ፡ምን፡ቸር፡ትለኛለኽ፧ከአንዱ፡ከእግዚአብሔር፡በቀር፡ቸር፡ማንም፡የለም።
19፤ትእዛዛትን፡ታውቃለኽ፤አታመንዝር፥አትግደል፥አትስረቅ፥በሐሰት፡አትመስክር፥አታታል፟፥አባትኽንና፡እና ትኽን፡አክብር፡አለው።
20፤ርሱም፡መልሶ፦መምህር፡ሆይ፥ይህን፡ዅሉ፡ከሕፃንነቴ፡ዠምሬ፡ጠብቄያለኹ፡አለው።
21፤ኢየሱስም፡ወደ፡ርሱ፡ተመልክቶ፡ወደደውና፦አንድ፡ነገር፡ጐደለኽ፤ኺድ፥ያለኽን፡ዅሉ፡ሽጠኽ፡ለድኻዎች፡ስ ጥ፥በሰማይም፡መዝገብ፡ታገኛለኽ፥መስቀሉንም፡ተሸክመኽ፡ና፥ተከተለኝ፡አለው።
22፤ነገር፡ግን፥ስለዚህ፡ነገር፡ፊቱ፡ጠቈረ፥ብዙ፡ንብረት፡ነበረውና፡እያዘነም፡ኼደ።
23፤ኢየሱስም፡ዘወር፡ብሎ፡አይቶ፡ደቀ፡መዛሙርቱን፦ገንዘብ፡ላላቸው፡ወደእግዚአብሔር፡መንግሥት፡መግባት፡እ ንዴት፡ጭንቅ፡ይኾናል፡አላቸው።
24፤ደቀ፡መዛሙርቱም፡እነዚህን፡ቃሎች፡አደነቁ።ኢየሱስም፡ደግሞ፡መልሶ፦ልጆች፡ሆይ፥በገንዘብ፡ለሚታመኑ፡ወ ደእግዚአብሔር፡መንግሥት፡መግባት፡እንዴት፡ጭንቅ፡ነው።
25፤ባለጠጋ፡ወደእግዚአብሔር፡መንግሥት፡ከሚገባ፡ግመል፡በመርፌ፡ቀዳዳ፡ቢያልፍ፡ይቀላል፡አላቸው።
26፤እነርሱም፡ያለመጠን፡ተገረሙና፡ርስ፡በርሳቸው፦እንግዲያ፡ማን፡ሊድን፡ይችላል፧ተባባሉ።
27፤ኢየሱስም፡ተመለከታቸውና፦ይህ፡በእግዚአብሔር፡ዘንድ፡እንጂ፡በሰው፡ዘንድ፡አይቻልም፤በእግዚአብሔር፡ዘ ንድ፡ዅሉ፡ይቻላልና፥አለ።
28፤ጴጥሮስም፦እንሆ፥እኛ፡ዅሉን፡ትተን፡ተከተልንኽ፡ይለው፡ዠመር።
29፤ኢየሱስም፡መልሶ፡እንዲህ፡አለ፦እውነት፡እላችዃለኹ፥ስለ፡እኔና፡ስለ፡ወንጌል፡ቤትን፡ወይም፡ወንድሞችን ፡ወይም፡እኅቶችን፡ወይም፡አባትን፡ወይም፡እናትን፡ወይም፡ሚስትን፡ወይም፡ልጆችን፡ወይም፡ዕርሻን፡የተወ፥
30፤አኹን፡በዚህ፡ዘመን፡ከስደት፡ጋራ፡ቤቶችን፡ወንድሞችንና፡እኅቶችንም፡እናቶችንም፡ልጆችንም፡ዕርሻንም፡ መቶ፡ዕጥፍ፥በሚመጣውም፡ዓለም፡የዘለዓለም፡ሕይወት፡የማይቀበል፡ማንም፡የለም።
31፤ግን፡ብዙ፡ፊተኛዎች፡ዃለኛዎች፡ዃለኛዎችም፡ፊተኛዎች፡ይኾናሉ።
32፤ወደ፡ኢየሩሳሌምም፡ሊወጡ፡በመንገድ፡ነበሩ፥ኢየሱስም፡ይቀድማቸው፡ነበርና፥ተደነቁ፤የተከተሉትም፡ይፈሩ ፡ነበር።ደግሞም፡ዐሥራ፡ኹለቱን፡ወደ፡ርሱ፡አቅርቦ፡ይደርስበት፡ዘንድ፡ያለውን፡ይነግራቸው፡ዠመር።
33፤እንሆ፥ወደ፡ኢየሩሳሌም፡እንወጣለን፥የሰው፡ልጅም፡ለካህናት፡አለቃዎችና፡ለጻፊዎች፡ዐልፎ፡ይሰጣል፥የሞ ት፡ፍርድም፡ይፈርዱበታል፥ለአሕዛብም፡አሳልፈው፡ይሰጡታል፥
34፤ይዘብቱበትማል፡ይተፉበትማል፡ይገርፉትማል፡ይገድሉትማል፥በሦስተኛውም፡ቀን፡ይነሣል፡አላቸው።
35፤የዘብዴዎስ፡ልጆች፡ያዕቆብና፡ዮሐንስም፡ወደ፡ርሱ፡ቀርበው፦መምህር፡ሆይ፥የምንለምንኽን፡ዅሉ፡እንድታደ ርግልን፡እንወዳለን፡አሉት።
36፤ርሱም፦ምን፡ላደርግላችኹ፡ትወዳላችኹ፧አላቸው።
37፤እነርሱም፦በክብርኽ፡ጊዜ፡አንዳችን፡በቀኝ፡አንዳችንም፡በግራኽ፡መቀመጥን፡ስጠን፡አሉት።
38፤ኢየሱስ፡ግን፦የምትለምኑትን፡አታውቁም።እኔ፡የምጠጣውን፡ጽዋ፡ልትጠጡ፥እኔ፡የምጠመቀውንስ፡ጥምቀት፡ል ትጠመቁ፡ትችላላችኹን፧አላቸው።
39፤እነርሱም፦እንችላለን፡አሉት።ኢየሱስም፦እኔ፡የምጠጣውን፡ጽዋ፡ትጠጣላችኹ፥እኔ፡የምጠመቀውንም፡ጥምቀት ፡ትጠመቃላችኹ፤
40፤በቀኝና፡በግራ፡መቀመጥ፡ግን፡ለተዘጋጀላቸው፡ነው፡እንጂ፡የምሰጥ፡እኔ፡አይደለኹም፡አላቸው።
41፤ዐሥሩም፡ሰምተው፡በያዕቆብና፡በዮሐንስ፡ይቈጡ፡ዠመር።
42፤ኢየሱስም፡ወደ፡ርሱ፡ጠርቶ፡እንዲህ፡አላቸው፦የአሕዛብ፡አለቃዎች፡ተብሎ፡የምታስቡት፡እንዲገዟቸው፡ታላ ላቆቻቸውም፡በላያቸው፡እንዲሠለጥኑ፡ታውቃላችኹ።
43፤በእናንተስ፡እንዲህ፡አይደለም፤ነገር፡ግን፥ማንም፡ከእናንተ፡ታላቅ፡ሊኾን፡የሚወድ፡የእናንተ፡አገልጋይ ፡ይኹን፥
44፤ከእናንተም፡ማንም፡ፊተኛ፡ሊኾን፡የሚወድ፡የዅሉ፡ባሪያ፡ይኹን፤
45፤እንዲሁ፡የሰው፡ልጅም፡ሊያገለግልና፡ነፍሱን፡ለብዙዎች፡ቤዛ፡ሊሰጥ፡እንጂ፡እንዲያገለግሉት፡አልመጣም።
46፤ወደ፡ኢያሪኮም፡መጡ።ከደቀ፡መዛሙርቱና፡ከብዙ፡ሕዝብ፡ጋራ፡ከኢያሪኮ፡ሲወጣ፡የጤሜዎስ፡ልጅ፡ዕውሩ፡በር ጤሜዎስ፡እየለመነ፡በመንገድ፡ዳር፡ተቀምጦ፡ነበር።
47፤የናዝሬቱ፡ኢየሱስም፡እንደ፡ኾነ፡በሰማ፡ጊዜ፦የዳዊት፡ልጅ፡ኢየሱስ፡ሆይ፥ማረኝ፡እያለ፡ይጮኽ፡ዠመር።
48፤ብዙዎችም፡ዝም፡እንዲል፡ገሠጹት፤ርሱ፡ግን፦የዳዊት፡ልጅ፡ሆይ፥ማረኝ፡እያለ፡አብዝቶ፡ጮኸ።
49፤ኢየሱስም፡ቆመና፦ጥሩት፡አለ።ዕውሩንም፦አይዞኽ፥ተነሣ፥ይጠራኻል፡ብለው፡ጠሩት።
50፤ርሱም፡እየዘለለ፡ተነሣና፡ልብሱን፡ጥሎ፡ወደ፡ኢየሱስ፡መጣ።
51፤ኢየሱስም፡መልሶ፦ምን፡ላደርግልኽ፡ትወዳለኽ፧አለው።ዕውሩም፦መምህር፡ሆይ፥አይ፡ዘንድ፡አለው።
52፤ኢየሱስም፦ኺድ፤እምነትኽ፡አድኖኻል፡አለው።ወዲያውም፡አየ፡በመንገድም፡ተከተለው።
_______________የማርቆስ፡ወንጌል፥ምዕራፍ፡11።______________
ምዕራፍ፡11፤
1፤ወደ፡ኢየሩሳሌምም፡ከደብረ፡ዘይት፡አጠገብ፡ወዳሉቱ፡ወደ፡ቤተ፡ፋጌና፡ወደ፡ቢታንያ፡በቀረቡ፡ጊዜ፥ከደቀ፡ መዛሙርቱ፡ኹለቱን፡ልኮ።
2፤በፊታችኹ፡ወዳለችው፡መንደር፡ኺዱ፥ወዲያውም፡ወደ፡ርሷ፡ገብታችኹ፡ከሰው፡ማንም፡ገና፡ያልተቀመጠበት፡ውር ንጫ፡ታስሮ፡ታገኛላችኹ፤ፈታ፟ችኹ፡አምጡልኝ።
3፤ማንም፦ስለ፡ምን፡እንዲህ፡ታደርጋላችኹ፧ቢላችኹ።ለጌታ፡ያስፈልገዋል፡በሉት፥ወዲያውም፡ደግሞ፡ወደዚህ፡ይ ሰደዋል፡አላቸው።
4፤ኼዱም፡ውርንጫውንም፡በመንገድ፡መተላለፊያ፡በደጅ፡ውጭ፡ታስሮ፡አገኙት፥ፈቱትም፦
5፤በዚያም፡ከቆሙት፡አንዳንዶቹ፦ውርንጫውን፡የምትፈቱት፡ምን፡ልታደርጉት፡ነው፡አሏቸው።
6፤እነርሱም፡ኢየሱስ፡እንዳዘዘ፡አሏቸው፤ተዉአቸውም፦
7፤ውርንጫውንም፡ወደ፡ኢየሱስ፡አመጡት፥ልብሳቸውንም፡በላዩ፡ጣሉ፥ተቀመጠበትም።
8፤ብዙ፡ሰዎችም፡ልብሳቸውን፡በመንገድ፡ላይ፡አነጠፉ፥ሌላዎችም፡ከዛፍ፡ቅጠሎችን፡እየቈረጡ፡ያነጥፉ፡ነበር።
9፤የሚቀድሙትም፡የሚከተሉትም፦ሆሣዕና፤በጌታ፡ስም፡የሚመጣ፡የተባረከ፡ነው፤
10፤በጌታ፡ስም፡የምትመጣ፡የአባታችን፡የዳዊት፡መንግሥት፡የተባረከች፡ናት፤ሆሣዕና፡በአርያም፡እያሉ፡ይጮኹ ፡ነበር።
11፤ኢየሱስም፡ወደ፡ኢየሩሳሌም፡ወደ፡መቅደስ፡ገባ፤ዘወር፡ብሎም፡ዅሉን፡ከተመለከተ፡በዃላ፥ጊዜው፡መሽቶ፡ስ ለ፡ነበር፥ከዐሥራ፡ኹለቱ፡ጋራ፡ወደ፡ቢታንያ፡ወጣ።
12፤በማግስቱም፡ከቢታንያ፡ሲወጡ፡ተራበ።
13፤ቅጠልም፡ያላት፡በለስ፡ከሩቅ፡አይቶ፡ምናልባት፡አንዳች፡ይገኝባት፡እንደ፡ኾነ፡ብሎ፡መጣ፥ነገር፡ግን፥የ በለስ፡ወራት፡አልነበረምና፡መጥቶ፡ከቅጠል፡በቀር፡ምንም፡አላገኘባትም።
14፤መልሶም፦ካኹን፡ዠምሮ፡ለዘለዓለም፡ማንም፡ከአንቺ፡ፍሬ፡አይብላ፡አላት።ደቀ፡መዛሙርቱም፡ሰሙ።
15፤ወደ፡ኢየሩሳሌምም፡መጡ።ወደ፡መቅደስም፡ገብቶ፡በመቅደስ፡የሚሸጡትንና፡የሚገዙትን፡ያወጣ፡ዠመር፥የገን ዘብ፡ለዋጮችንም፡ገበታዎች፡የርግብ፡ሻጪዎችንም፡ወንበሮች፡ገለበጠ፤
16፤ዕቃም፡ተሸክሞ፡ማንም፡በመቅደስ፡ሊያልፍ፡አልፈቀደም።
17፤አስተማራቸውም፦ቤቴ፡ለአሕዛብ፡ዅሉ፡የጸሎት፡ቤት፡ትባላለች፡ተብሎ፡የተጻፈ፡አይደለምን፧እናንተ፡ግን፡ የወንበዴዎች፡ዋሻ፡አደረጋችዃት፡አላቸው።
18፤የካህናት፡አለቃዎችም፡ጻፊዎችም፡ሰምተው፥ሕዝቡ፡ዅሉ፡በትምህርቱ፡ይገረሙ፡ስለ፡ነበር፡ይፈሩት፡ነበርና ፥እንዴት፡አድርገው፡እንዲያጠፉት፡ፈለጉ።
19፤ማታ፡ማታም፡ከከተማ፡ወደ፡ውጭ፡ይወጣ፡ነበር።
20፤ማለዳም፡ሲያልፉ፡በለሲቱን፡ከሥሯ፡ደርቃ፡አይዋት።
21፤ጴጥሮስም፡ትዝ፡ብሎት።መምህር፡ሆይ፥እንሆ፥የረገምኻት፡በለስ፡ደርቃለች፡አለው።
22፤ኢየሱስም፡መልሶ፡እንዲህ፡አላቸው፦በእግዚአብሔር፡እመኑ።
23፤እውነት፡እላችዃለኹ፥ማንም፡ያለው፡ነገር፡እንዲደረግለት፡ቢያምን፡በልቡ፡ሳይጠራጠር፥ይህን፡ተራራ፦ተነ ቅለኽ፡ወደ፡ባሕር፡ተወርወር፡ቢል፡ይኾንለታል።
24፤ስለዚህ፥እላችዃለኹ፥የጸለያችኹትን፡የለመናችኹትንም፡ዅሉ፡እንዳገኛችኹት፡እመኑ፥ይኾንላችኹማል።
25፤ለጸሎትም፡በቆማችኹ፡ጊዜ፥በሰማያት፡ያለው፡አባታችኹ፡ደግሞ፡ኀጢአታችኹን፡ይቅር፡እንዲላችኹ፥በማንም፡ ላይ፡አንዳች፡ቢኖርባችኹ፡ይቅር፡በሉት።
26፤እናንተ፡ግን፡ይቅር፡ባትሉ፡በሰማያት፡ያለው፡አባታችኹም፡ኀጢአታችኹን፡ይቅር፡አይላችኹም።
27፤ደግሞም፡ወደ፡ኢየሩሳሌም፡መጡ።ርሱም፡በመቅደስ፡ሲመላለስ፥የካህናት፡አለቃዎችና፡ጻፊዎች፡ሽማግሌዎችም ፡ወደ፡ርሱ፡መጥተው፦
28፤እነዚህን፡በምን፡ሥልጣን፡ታደርጋለኽ፧ወይስ፡እነዚህን፡ለማድረግ፡ይህን፡ሥልጣን፡ማን፡ሰጠኽ፧አሉት።
29፤ኢየሱስም፦እኔም፡አንዲት፡ነገር፡እጠይቃችዃለኹ፥እናንተም፡መልሱልኝ፥እኔም፡በምን፡ሥልጣን፡እነዚህን፡ እንዳደርግ፡እነግራችዃለኹ።
30፤የዮሐንስ፡ጥምቀት፡ከሰማይ፡ነበረችን፡ወይስ፡ከሰው፧መልሱልኝ፡አላቸው።
31፤ርስ፡በርሳቸውም፡ሲነጋገሩ፦ከሰማይ፡ነው፡ብንል፦እንግዲያውስ፡ስለ፡ምን፡አላመናችኹበትም፧ይለናል፤
32፤ነገር፡ግን፦ከሰው፡ነው፡እንበልን፧አሉ፤ዅሉ፡ዮሐንስን፡በእውነት፡እንደ፡ነቢይ፡ያዩት፡ነበርና፥ሕዝቡን ፡ፈሩ።
33፤ለኢየሱስም፡መልሰው፦አናውቅም፡አሉት፡ኢየሱስም፦እኔም፡በምን፡ሥልጣን፡እነዚህን፡እንዳደርግ፡አልነግራ ችኹም፡አላቸው።
_______________የማርቆስ፡ወንጌል፥ምዕራፍ፡12።______________
ምዕራፍ፡12፤
1፤በምሳሌም፡ይነግራቸው፡ዠመር፦አንድ፡ሰው፡የወይን፡አትክልት፡ተከለ፥ቅጥርም፡ቀጠረለት፥መጥመቂያም፡ማሰለ ት፥ግንብም፡ሠራና፡ለገበሬዎች፡አከራይቶ፡ወደ፡ሌላ፡አገር፡ኼደ።
2፤በጊዜውም፡ከወይን፡አትክልት፡ፍሬ፡ከገበሬዎቹ፡እንዲቀበል፡አንድ፡ባሪያ፡ወደ፡ገበሬዎቹ፡ላከ፤
3፤ይዘውም፡ደበደቡት፡ባዶውንም፡ሰደዱት።
4፤ዳግመኛም፡ሌላውን፡ባሪያ፡ወደ፡እነርሱ፡ላከ፡ርሱንም፡ወግረው፡ራሱን፡አቈሰሉት፡አዋርደውም፡ሰደዱት።
5፤ሌላውንም፡ላከ፤ርሱንም፡ገደሉት፥ከሌላዎችም፡ከብዙዎች፡አንዳንዱን፡ደበደቡ፡አንዳንዱንም፡ገደሉ።
6፤የሚወደ፟ው፡አንድ፡ልጅ፡ገና፡ነበረው፤ልጄንስ፡ያፍሩታል፡ብሎ፡ርሱን፡ከዅሉ፡በዃላ፡ወደ፡እነርሱ፡ላከ።
7፤እነዚያ፡ገበሬዎች፡ግን፡ርስ፡በርሳቸው፦ወራሹ፡ይህ፡ነው፤ኑ፥እንግደለው፥ርስቱም፡ለኛ፡ይኾናል፡ተባባሉ።
8፤ይዘውም፡ገደሉት፥ከወይኑም፡አትክልት፡ወደ፡ውጭ፡ጣሉት።
9፤እንግዲህ፡የወይኑ፡አትክልት፡ጌታ፡ምን፡ያደርጋል፧ይመጣል፥ገበሬዎቹንም፡ያጠፋል፥የወይኑንም፡አትክልት፡ ለሌላዎች፡ይሰጣል።
10-11፤«ግንበኛዎች፡የናቁት፡ድንጋይ፡ርሱ፡የማእዘን፡ራስ፡ኾነ፤ይህም፡ከጌታ፡ዘንድ፡ኾነ፥ለዐይኖቻችንም፡ድን ቅ፡ነው»፡የሚለውን፡ይህን፡መጽሐፍ፡አላነበባችኹምን፧
12፤ምሳሌውንም፡ስለ፡እነርሱ፡እንደ፡ተናገረ፡ዐውቀዋልና፥ሊይዙት፡ፈለጉ፥ነገር፡ግን፥ሕዝቡን፡ፈሩ።ትተውት ም፡ኼዱ።
13፤በንግግርም፡ሊያጠምዱት፡ከፈሪሳውያንና፡ከሄሮድስ፡ወገን፡የኾኑትን፡ወደ፡ርሱ፡ላኩ።
14፤መጥተውም፦መምህር፡ሆይ፥የሰውን፡ፊት፡ሳትመለከት፡በእውነት፡የእግዚአብሔር፡መንገድ፡ታስተምራለኽና፡እ ውነተኛ፡እንደ፡ኾንኽ፡ለማንምም፡እንዳታደላ፡እናውቃለን፤ለቄሳር፡ግብር፡መስጠት፡ተፈቅዷልን፡ወይስ፡አልተ ፈቀደም፧እንስጥን፡ወይስ፡አንስጥ፧አሉት።
15፤ርሱ፡ግን፡ግብዝነታቸውን፡ዐውቆ፦ለምን፡ትፈትኑኛላችኹ፧አየው፡ዘንድ፡አንድ፡ዲናር፡አምጡልኝ፡አላቸው።
16፤እነርሱም፡አመጡለት፦ይህች፡መልክ፡ጽሕፈቲቱስ፡የማን፡ናት፧አላቸው፤እነርሱም፦የቄሳር፡ናት፡አሉት።
17፤ኢየሱስም፡መልሶ፦የቄሳርን፡ለቄሳር፡የእግዚአብሔርንም፡ለእግዚአብሔር፡አስረክቡ፡አላቸው።በርሱም፡ተደ ነቁ።
18፤ትንሣኤ፡ሙታን፡የለም፡የሚሉ፡ሰዱቃውያን፡ወደ፡ርሱ፡መጥተው፡ጠየቁት፡እንዲህም፡አሉት።
19፤መምህር፡ሆይ፥ሙሴ፦የአንድ፡ሰው፡ወንድም፡ሚስቱን፡ትቶ፡ልጅ፡ሳያስቀር፡ቢሞት፥ወንድሙ፡ሚስቱን፡አግብቶ ፡ለወንድሙ፡ዘር፡ይተካ፡ብሎ፡ጻፈልን።
20፤ሰባት፡ወንድማማቾች፡ነበሩ፤ፊተኛውም፡ሚስት፡አግብቶ፡ዘር፡ሳያስቀር፡ሞተ፤
21፤ኹለተኛውም፡አገባት፥ዘርም፡ሳይተው፡ሞተ፤ሦስተኛውም፡እንዲሁ፤
22፤ሰባቱም፡አገቧት፥ዘርም፡አላስቀሩም።ከዅሉም፡በዃላ፡ሴቲቱ፡ደግሞ፡ሞተች።
23፤ሰባቱ፡አግብተዋታልና፥በትንሣኤ፡ቀን፡ሲነሡ፡ከነርሱ፡ለማናቸው፡ሚስት፡ትኾናለች፧
24፤ኢየሱስም፡መልሶ፡እንዲህ፡አላቸው፦መጻሕፍትንና፡የእግዚአብሔርን፡ኀይል፡አታውቁምና፡ስለዚህ፡የምትስቱ ፡አይደለምን፧
25፤ከሙታንስ፡ሲነሡ፡በሰማያት፡እንዳሉ፡መላእክት፡ይኾናሉ፡እንጂ፡አያገቡም፥አይጋቡምም።
26፤ስለ፡ሙታን፡ግን፡እንዲነሡ፡እግዚአብሔር፦እኔ፡የአብርሃም፡አምላክ፡የይሥሐቅም፡አምላክ፡የያዕቆብም፡አ ምላክ፡ነኝ፡እንዳለው፡በሙሴ፡መጽሐፍ፡በቍጥቋጦው፡ዘንድ፡የተጻፈውን፡አላነበባችኹምን፧
27፤የሕያዋን፡አምላክ፡ነው፡እንጂ፡የሙታን፡አይደለም።እንግዲህ፡እጅግ፡ትስታላችኹ።
28፤ከጻፊዎችም፡አንዱ፡ቀርቦ፡ሲከራከሩ፡ሰማና፡መልካም፡አድርጎ፡እንደ፡መለሰላቸው፡አስተውሎ፦ከዅሉ፡ፊተኛ ዪቱ፡ትእዛዝ፡ማናቸዪቱ፡ናት፧ብሎ፡ጠየቀው።
29፤ኢየሱስም፡መልሶ፡እንዲህ፡አለው፦ከትእዛዛቱ፡ዅሉ፡ፊተኛዪቱ፦እስራኤል፡ሆይ፥ስማ፤ጌታ፡አምላካችን፡አን ድ፡ጌታ፡ነው፥
30፤አንተም፡በፍጹም፡ልብኽ፡በፍጹምም፡ነፍስኽ፡በፍጹምም፡ዐሳብኽ፡በፍጹምም፡ኀይልኽ፡ጌታ፡አምላክኽን፡ውደ ድ፡የምትል፡ናት።ፊተኛዪቱ፡ትእዛዝ፡ይህች፡ናት።
31፤ኹለተኛዪቱም፦ባልንጀራኽን፡እንደ፡ራስኽ፡ውደድ፡የምትል፡ርሷን፡የምትመስል፡ይህች፡ናት።ከነዚህ፡የምት በልጥ፡ሌላ፡ትእዛዝ፡የለችም።
32፤ጻፊውም፦መልካም፡ነው፥መምህር፡ሆይ፤አንድ፡ነው፥ከርሱም፡በቀር፡ሌላ፡የለም፡ብለኽ፡በእውነት፡ተናገርኽ ፤
33፤በፍጹም፡ልብ፡በፍጹም፡አእምሮም፡በፍጹም፡ነፍስም፡በፍጹም፡ኀይልም፡ርሱን፡መውደድ፥ባልንጀራንም፡እንደ ፡ራስ፡መውደድ፡በሙሉ፡ከሚቃጠል፡መሥዋዕትና፡ከሌላው፡መሥዋዕት፡ዅሉ፡የሚበልጥ፡ነው፡አለው።
34፤ኢየሱስም፡በአእምሮ፡እንደ፡መለሰ፡አይቶ፦አንተ፡ከእግዚአብሔር፡መንግሥት፡የራቅኽ፡አይደለኽም፡አለው። ከዚህም፡በዃላ፡ማንም፡ሊጠይቀው፡አልደፈረም።
35፤ኢየሱስም፡በመቅደስ፡ሲያስተምር፡መልሶ፡እንዲህ፡አለ፦ጻፊዎች፡ክርስቶስ፡የዳዊት፡ልጅ፡ነው፡እንዴት፡ይ ላሉ፧
36፤ዳዊት፡ራሱ፡በመንፈስ፡ቅዱስ፦ጌታ፡ጌታዬን፦ጠላቶችኽን፡የእግርኽ፡መረገጫ፡እስካደርግልኽ፡ድረስ፡በቀኜ ፡ተቀመጥ፡አለው፡አለ።
37፤ዳዊትም፡ራሱ፡ጌታ፡አለው፤እንዴትስ፡ልጁ፡ይኾናል፧ብዙ፡ሕዝብም፡በደስታ፡ይሰሙት፡ነበር።
38-39፤ሲያስተምርም፡እንዲህ፡አለ፦ረዣዥም፡ልብስ፡ለብሰው፡መዞርን፥በገበያም፡ሰላምታን፥በምኵራብም፡የከበሬ ታን፡ወንበር፥በግብርም፡የከበሬታን፡ስፍራ፡ከሚወዱ፡ከጻፊዎች፡ተጠበቁ፤
40፤የመበለቶችን፡ቤት፡የሚበሉ፡ጸሎታቸውንም፡በማስረዘም፡የሚያመካኙ፡እነዚህ፡የባሰ፡ፍርድ፡ይቀበላሉ።
41፤ኢየሱስም፡በመዝገብ፡አንጻር፡ተቀምጦ፡ሕዝቡ፡በመዝገብ፡ውስጥ፡ገንዘብ፡እንዴት፡እንዲጥሉ፡ያይ፡ነበር፤ ብዙ፡ባለጠጋዎችም፡ብዙ፡ይጥሉ፡ነበር፤
42፤አንዲትም፡ድኻ፡መበለት፡መጥታ፡አንድ፡ሳንቲም፡የሚያኽሉ፡ኹለት፡ናስ፡ጣለች።
43፤ደቀ፡መዛሙርቱንም፡ጠርቶ፦እውነት፡እላችዃለኹ፥በመዝገብ፡ውስጥ፡ከሚጥሉት፡ዅሉ፡ይልቅ፡ይህች፡ድኻ፡መበ ለት፡አብልጣ፡ጣለች፤
44፤ዅሉ፡ከትርፋቸው፡ጥለዋልና፥ይህች፡ግን፡ከጕድለቷ፡የነበራትን፡ዅሉ፡ትዳሯን፡ዅሉ፡ጣለች፡አላቸው።
_______________የማርቆስ፡ወንጌል፥ምዕራፍ፡13።______________
ምዕራፍ፡13፤
1፤ርሱም፡ከመቅደስ፡ሲወጣ፡ከደቀ፡መዛሙርቱ፡አንዱ፦መምህር፡ሆይ፥እንዴት፡ያሉ፡ድንጋይዎችና፡እንዴት፡ያሉ፡ ሕንጻዎች፡እንደ፡ኾኑ፡እይ፡አለው።
2፤ኢየሱስም፡መልሶ፦እነዚህን፡ታላላቅ፡ሕንጻዎች፡ታያለኽን፧ድንጋይ፡በድንጋይ፡ላይ፡ሳይፈርስ፡በዚህ፡አይቀ ርም፡አለው።
3፤በመቅደስም፡ትይዩ፡በደብረ፡ዘይት፡ተቀምጦ፡ሳለ፥ጴጥሮስና፡ያዕቆብ፡ዮሐንስም፡እንድርያስም።
4፤ንገረን፥ይህ፡መቼ፡ይኾናል፧ይህስ፡ዅሉ፡ይፈጸም፡ዘንድ፡እንዳለው፡ምልክቱ፡ምንድር፡ነው፧ብለው፡ለብቻቸው ፡ጠየቁት።
5፤ኢየሱስም፡መልሶ፡እንዲህ፡ይላቸው፡ዠመር።ማንም፡እንዳያስታችኹ፡ተጠንቀቁ።
6፤ብዙዎች፦እኔ፡ነኝ፡እያሉ፡በስሜ፡ይመጣሉና፥ብዙዎችንም፡ያስታሉ።
7፤ጦርንም፡የጦርንም፡ወሬ፡በሰማችኹ፡ጊዜ፡አትደንግጡ፤ይህ፡ሊኾን፡ግድ፡ነውና፥ነገር፡ግን፥መጨረሻው፡ገና፡ ነው።
8፤ሕዝብ፡በሕዝብ፡ላይ፡መንግሥትም፡በመንግሥት፡ላይ፡ይነሣልና፤በልዩ፡ልዩ፡ስፍራ፡የምድር፡መናወጥ፡ይኾናል ፤ራብ፡ይኾናል፤እነዚህ፡የምጥ፡ጣር፡መዠመሪያ፡ናቸው።
9፤እናንተ፡ግን፡ለራሳችኹ፡ተጠንቀቁ፤ወደ፡ሸንጎ፡አሳልፈው፡ይሰጧችዃል፡በምኵራብም፡ትገረፋላችኹ፡ምስክርም ፡ይኾንባቸው፡ዘንድ፡ስለ፡እኔ፡በገዢዎችና፡በነገሥታት፡ፊት፡ትቆማላችኹ።
10፤አስቀድሞም፡ወንጌል፡ለአሕዛብ፡ዅሉ፡ይሰበክ፡ዘንድ፡ይገ፟ባ፟ል።
11፤ሲጐትቷችኹና፡አሳልፈው፡ሲሰጧችኹም፡ምን፡እንድትናገሩ፡አስቀድማችኹ፡አትጨነቁ፥ዳሩ፡ግን፡በዚያች፡ሰዓ ት፡የሚሰጣችኹን፡ተናገሩ፤የሚነግረው፡መንፈስ፡ቅዱስ፡ነው፡እንጂ፡እናንተ፡አይደላችኹምና።
12፤ወንድምም፡ወንድሙን፡አባትም፡ልጁን፡ለሞት፡አሳልፎ፡ይሰጣል፥ልጆችም፡በወላጆቻቸው፡ላይ፡ይነሣሉ።ይገድ ሏቸውማል፤
13፤በዅሉም፡ዘንድ፡ስለ፡ስሜ፡የተጠላችኹ፡ትኾናላችኹ፤እስከ፡መጨረሻ፡የሚጸና፡ግን፡ርሱ፡ይድናል።
14፤ነገር፡ግን፥በነቢዩ፡በዳንኤል፡የተባለውን፡የጥፋት፡ርኵሰት፡በማይገ፟ባ፟ው፡ስፍራ፡ቆሞ፡ብታዩ፥አንባቢ ው፡ያስተውል፥በዚያን፡ጊዜ፡በይሁዳ፡ያሉ፡ወደ፡ተራራዎች፡ይሽሹ፥
15፤በሰገነትም፡ያለ፡ወደ፡ቤት፡አይውረድ፡ከቤቱም፡አንዳች፡ይወስድ፡ዘንድ፡አይግባ፥
16፤በዕርሻም፡ያለ፡ልብሱን፡ይወስድ፡ዘንድ፡ወደ፡ዃላው፡አይመለስ።
17፤በዚያን፡ወራትም፡ለርጕዞችና፡ለሚያጠቡ፡ወዮላቸው።
18፤ነገር፡ግን፥ሽሽታችኹ፡በክረምት፡እንዳይኾን፡ጸልዩ፤
19፤በዚያን፡ወራት፡እግዚአብሔር፡ከፈጠረው፡ከፍጥረት፡መዠመሪያ፡ዠምሮ፡እስከ፡አኹን፡ድረስ፡ያልኾነ፡ደግሞ ም፡የማይኾን፡የመከራ፡ዐይነት፡ይኾናልና።
20፤ጌታስ፡ወራቶቹን፡ባያሳጥር፥ሥጋ፡የለበሰ፡ዅሉ፡ባልዳነም፤ነገር፡ግን፥ስለመረጣቸው፡ምርጦች፡ወራቶቹን፡ አሳጠረ።
21፤በዚያን፡ጊዜም፡ማንም፦እንሆ፥ክርስቶስ፡ከዚህ፡አለ፥ወይም፦እንሆ፥ከዚያ፡አለ፡ቢላችኹ፡አትመኑ፤
22፤ሐሰተኛዎች፡ክርስቶሶችና፡ሐሰተኛዎች፡ነቢያት፡ይነሣሉና፥ቢቻላቸውስ፡የተመረጡትን፡እንኳ፡ያስቱ፡ዘንድ ፡ምልክትና፡ድንቅ፡ያደርጋሉ።
23፤እናንተ፡ግን፡ተጠንቀቁ፤እንሆ፥አስቀድሜ፡ዅሉን፡ነገርዃችኹ።
24፤በዚያን፡ወራት፡ግን፡ከዚያ፡መከራ፡በዃላ፡ፀሓይ፡ይጨልማል፡ጨረቃም፡ብርሃኗን፡አትሰጥም፥
25፤ከዋክብትም፡ከሰማይ፡ይወድቃሉ፥የሰማያትም፡ኀይላት፡ይናወጣሉ።
26፤በዚያን፡ጊዜም፡የሰው፡ልጅ፡በብዙ፡ኀይልና፡ክብር፡በደመና፡ሲመጣ፡ያዩታል።
27፤በዚያን፡ጊዜም፡መላእክትን፡ይልካል፡ከአራቱ፡ነፋሳትም፡ከምድር፡ዳርቻ፡እስከሰማይ፡ዳርቻ፡የተመረጡትን ፡ይሰበስባቸዋል።
28፤ምሳሌውንም፡ከበለስ፡ተማሩ፤ጫፏ፡ሲለሰልስ፡ቅጠሏም፡ሲያቈጠቍጥ፥ያን፡ጊዜ፡በጋ፡እንደ፡ቀረበ፡ታውቃላች ኹ፤
29፤እንዲሁ፡ደግሞ፡እናንተ፡ይህን፡ዅሉ፡መኾኑን፡ስታዩ፡ቀርቦ፡በደጅ፡እንደ፡ኾነ፡ዕወቁ።
30፤እውነት፡እላችዃለኹ፥ይህ፡ዅሉ፡እስኪኾን፡ድረስ፡ይህ፡ትውልድ፡አያልፍም።
31፤ሰማይና፡ምድር፡ያልፋሉ፡ቃሌ፡ግን፡አያልፍም።
32፤ስለዚያች፡ቀን፡ወይም፡ስለዚያች፡ሰዓት፡ግን፡የሰማይ፡መላእክትም፡ቢኾኑ፡ልጅም፡ቢኾን፡ከአባት፡በቀር፡ የሚያውቅ፡የለም።
33፤ጊዜው፡መቼ፡እንዲኾን፡አታውቁምና፡ተጠንቀቁ፤ትጉ፤ጸልዩም።
34፤ቤቱን፡ትቶ፡ወደ፡ሌላ፡አገር፡እንደ፡ኼደ፡ሰው፡ነው፥ለባሮቹም፡ሥልጣን፡ለያንዳንዱም፡ሥራውን፡ሰጥቶ፡በ ረኛውን፡እንዲተጋ፡አዘዘ።
35፤እንግዲህ፡በማታ፡ቢኾን፡ወይም፡በእኩለ፡ሌሊት፡ወይም፡ዶሮ፡ሲጮኽ፡ወይም፡በማለዳ፡ቢኾን፡ባለቤቱ፡መቼ፡ እንዲመጣ፡አታውቁምና፡
36፤ድንገት፡መጥቶ፡ተኝታችኹ፡እንዳያገኛችኹ፡ስለዚህ፡ትጉ።
37፤ለእናንተም፡የምነግራችኹ፡ለዅሉ፡እላለኹ፤ትጉ።
_______________የማርቆስ፡ወንጌል፥ምዕራፍ፡14።______________
ምዕራፍ፡14፤
1፤ከኹለት፡ቀን፡በዃላ፡ፋሲካና፡የቂጣ፡በዓል፡ነበረ።የካህናት፡አለቃዎችም፡ጻፊዎችም፡እንዴት፡አድርገው፡በ ተንኰል፡እንደሚይዙትና፡እንደሚገድሉት፡ይፈልጉ፡ነበር።
2፤የሕዝብ፡ሁከት፡እንዳይኾን፡በበዓል፡አይኹን፡ይሉ፡ነበርና።
3፤ርሱም፡በቢታንያ፡በለምጻሙ፡በስምዖን፡ቤት፡በነበረ፡ጊዜ፥በማእዱ፡ተቀምጦ፡ሳለ፥አንዲት፡ሴት፡ዋጋው፡እጅ ግ፡የከበረ፡ጥሩ፡ናርዶስ፡ሽቱ፡የመላበት፡የአልባስጥሮስ፡ቢልቃጥ፡ይዛ፡መጣች፤ቢልቃጡንም፡ሰብራ፡በራሱ፡ላ ይ፡አፈሰሰችው።
4፤አንዳንዶችም፦ይህ፡የሽቱ፡ጥፋት፡ለምንድር፡ነው፧
5፤ይህ፡ሽቱ፡ከሦስት፡መቶ፡ዲናር፡በሚበልጥ፡ዋጋ፡ተሽጦ፡ለድኻዎች፡ሊሰጥ፡ይቻል፡ነበርና፥ብለው፡በራሳቸው፡ ይቈጡ፡ነበር፤ርሷንም፡ነቀፏት።
6፤ኢየሱስ፡ግን፡እንዲህ፡አለ፦ተዋ፟ት፤ስለ፡ምን፡ታደክሟታላችኹ፧መልካም፡ሥራ፡ሠርታልኛለች።
7፤ድኻዎች፡ዅልጊዜ፡ከእናንተ፡ጋራ፡ይኖራሉና፥በማናቸውም፡በወደዳችኹት፡ጊዜ፡መልካም፡ልታደርጉላቸው፡ትችላ ላችኹ፥እኔ፡ግን፡ዅልጊዜ፡ከእናንተ፡ጋራ፡አልኖርም።
8፤የተቻላትን፡አደረገች፤አስቀድማ፡ለመቃብሬ፡ሥጋዬን፡ቀባችው።
9፤እውነት፡እላችዃለኹ፥ይህ፡ወንጌል፡በዓለሙ፡ዅሉ፡በሚሰበክበት፡በማናቸውም፡ስፍራ፥ርሷ፡ያደረገችው፡ደግሞ ፡ለርሷ፡መታሰቢያ፡ሊኾን፡ይነገራል።
10፤ከዐሥራ፡ኹለቱም፡አንዱ፡የአስቆሮቱ፡ይሁዳ፡አሳልፎ፡ሊሰጠው፡ወደ፡ካህናት፡አለቃዎች፡ኼደ።
11፤ሲሰሙም፡ደስ፡አላቸው፡ብርም፡ይሰጡት፡ዘንድ፡ተስፋ፡ሰጡት።በሚመች፡ጊዜም፡እንዴት፡አድርጎ፡አሳልፎ፡እ ንዲሰጠው፡ይፈልግ፡ነበር።
12፤ፋሲካን፡በሚያርዱበት፡በቂጣ፡በዓል፡መዠመሪያ፡ቀን፡ደቀ፡መዛሙርቱ።ፋሲካን፡ትበላ፡ዘንድ፡ወዴት፡ኼደን ፡ልናሰናዳ፡ትወዳለኽ፧አሉት።
13፤ከደቀ፡መዛሙርቱም፡ኹለት፡ላከ፡እንዲህም፡አላቸው፦ወደ፡ከተማ፡ኺዱ፥ማድጋ፡ውሃ፡የተሸከመ፡ሰውም፡ይገና ኛችዃል፤
14፤ተከተሉት፥የሚገባበትንም፡የቤቱን፡ጌታ፦መምህሩ፦ከደቀ፡መዛሙርቴ፡ጋራ፡ፋሲካን፡የምበላበት፡የእንግዳ፡ ቤት፡ወዴት፡ነው፧ይላል፡በሉት።
15፤ርሱም፡በደርብ፡ላይ፡ያለውን፡የተሰናዳና፡የተነጠፈ፡ታላቅ፡አዳራሽ፡ያሳያችዃል፤
16፤በዚያም፡አሰናዱልን፦ደቀ፡መዛሙርቱም፡ወጡ፡ወደ፡ከተማም፡ኼደው፡እንዳላቸው፡አገኙ፥ፋሲካንም፡አሰናዱ።
17፤በመሸም፡ጊዜ፡ከዐሥራ፡ኹለቱ፡ጋራ፡መጣ።
18፤ተቀምጠውም፡ሲበሉ፡ኢየሱስ፦እውነት፡እላችዃለኹ፥ከእናንተ፡አንዱ፥ርሱም፡ከእኔ፡ጋራ፡የሚበላው፡አሳልፎ ፡ይሰጠኛል፡አለ።
19፤እነርሱም፡ያዝኑ፥እያንዳንዳቸውም፦እኔ፡እኾንን፧ይሉት፡ዠመር።
20፤ርሱም፡መልሶ፦ከዐሥራ፡ኹለቱ፡አንዱ፡ከእኔ፡ጋራ፡ወደ፡ወጭቱ፡እጁን፡የሚያጠልቀው፡ነው።
21፤የሰው፡ልጅስ፡ስለ፡ርሱ፡እንደ፡ተጻፈ፡ይኼዳል፤ነገር፡ግን፥የሰው፡ልጅ፡ዐልፎ፡ለሚሰጥበት፡ለዚያ፡ሰው፡ ወዮለት፤ያ፡ሰው፡ባልተወለደ፡ይሻለው፡ነበር፡አላቸው።
22፤ሲበሉም፡ኢየሱስ፡እንጀራን፡አንሥቶ፡ባረከ፡ቈርሶም፡ሰጣቸውና፦እንካችኹ፤ይህ፡ሥጋዬ፡ነው፡አለ።
23፤ጽዋንም፡አንሥቶ፡አመስግኖም፡ሰጣቸው፥ዅሉም፡ከርሱ፡ጠጡ።
24፤ርሱም፦ይህ፡ስለ፡ብዙዎች፡የሚፈስ፡የዐዲስ፡ኪዳን፡ደሜ፡ነው።
25፤እውነት፡እላችዃለኹ፥በእግዚአብሔር፡መንግሥት፡ከወይኑ፡ፍሬ፡ዐዲሱን፡እስከምጠጣበት፡እስከዚያ፡ቀን፡ድ ረስ፡ደግሞ፡አልጠጣውም፡አላቸው።
26፤መዝሙርም፡ከዘመሩ፡በዃላ፡ወደ፡ደብረ፡ዘይት፡ወጡ።
27፤ኢየሱስም፦በዚች፡ሌሊት፡ዅላችኹ፡በእኔ፡ትሰናከላላችኹ፤እረኛውን፡እመታለኹ፥በጎችም፡ይበተናሉ፡የሚል፡ ተጽፏልና።
28፤ነገር፡ግን፥ከተነሣኹ፡በዃላ፡ወደ፡ገሊላ፡እቀድማችዃለኹ፡አላቸው።
29፤ጴጥሮስም፦ዅሉም፡ቢሰናከሉ፡እኔ፡ግን፡ከቶ፡አልሰናከልም፡አለው።
30፤ኢየሱስም፦እውነት፡እልኻለኹ፥ዛሬ፡በዚች፡ሌሊት፡ዶሮ፡ኹለት፡ጊዜ፡ሳይጮኽ፡ሦስት፡ጊዜ፡ትክደኛለኽ፡አለ ው።
31፤ርሱም፡ቃሉን፡አበርትቶ፦ከአንተ፡ጋራ፡የምሞት፡እንኳ፡ቢኾን፡ከቶ፡አልክድኽም፡አለ።ዅሉም፡ደግሞ፡እንደ ዚሁ፡አሉ።
32፤ጌቴሴማኒ፡ወደምትባልም፡ስፍራ፡መጡ፥ደቀ፡መዛሙርቱንም፦ስጸልይ፡ሳለኹ፥በዚህ፡ተቀመጡ፡አላቸው።
33፤ጴጥሮስንና፡ያዕቆብን፡ዮሐንስንም፡ከርሱ፡ጋራ፡ወሰደ፤ሊደነግጥም፡ሊተክዝም፡ዠመረና፦
34፤ነፍሴ፡እስከ፡ሞት፡ድረስ፡እጅግ፡ዐዘነች፤በዚህ፡ቈዩ፡ትጉም፡አላቸው።
35፤ጥቂትም፡ወደ፡ፊት፡እልፍ፡ብሎ፡በምድርም፡ወድቆ፥ይቻልስ፡ቢኾን፡ሰዓቲቱ፡ከርሱ፡እንድታልፍ፡ጸለየና፦
36፤አባ፡አባት፡ሆይ፥ዅሉ፡ይቻልኻል፤ይህችን፡ጽዋ፡ከእኔ፡ውሰድ፤ነገር፡ግን፥አንተ፡የምትወደ፟ው፡እንጂ፡እ ኔ፡የምወደ፟ው፡አይኹን፡አለ።
37፤መጣም፡ተኝተውም፡አገኛቸው፥ጴጥሮስንም፦ስምዖን፡ሆይ፥ተኝተኻልን፧አንዲት፡ሰዓት፡ስንኳ፡ልትተጋ፡አልቻ ልኽምን፧
38፤ወደ፡ፈተና፡እንዳትገቡ፡ትጉ፡ጸልዩም፤መንፈስስ፡ተዘጋጅታለች፥ሥጋ፡ግን፡ደካማ፡ነው፡አለው።
39፤ደግሞም፡ኼዶ፡ያንኑ፡ቃል፡ጸለየ።
40፤ደግሞም፡መጥቶ፡ዐይኖቻቸው፡በእንቅልፍ፡ከብደው፡ነበርና፥ተኝተው፡አገኛቸው፥የሚመልሱለትንም፡አላወቁም ።
41፤ሦስተኛም፡መጥቶ፦እንግዲህስ፡ተኙ፡ዕረፉም፤ይበቃል፤ሰዓቲቱ፡ደረሰች፤እንሆ፥የሰው፡ልጅ፡በኀጢአተኛዎች ፡እጅ፡ዐልፎ፡ይሰጣል።
42፤ተነሡ፥እንኺድ፤እንሆ፥አሳልፎ፡የሚሰጠኝ፡ቀርቧል፡አላቸው።
43፤ወዲያውም፡ገና፡ሲናገር፡ከዐሥራ፡ኹለቱ፡አንዱ፡ይሁዳ፡መጣ፥ከርሱም፡ጋራ፡ብዙ፡ሰዎች፡ሰይፍና፡ጐመድ፡ይ ዘው፡ከካህናት፡አለቃዎችና፡ከጻፊዎች፡ከሽማግሌዎችም፡ዘንድ፡መጡ።
44፤አሳልፎ፡የሚሰጠውም፦የምስመው፡ርሱ፡ነው፤ያዙት፡ተጠንቅቃችኹም፡ውሰዱት፡ብሎ፡ምልክት፡ሰጥቷቸው፡ነበር ።
45፤መጥቶም፡ወዲያው፡ወደ፡ርሱ፡ቀረበና፦መምህር፡ሆይ፥መምህር፡ሆይ፥ብሎ፡ሳመው፤
46፤እነርሱም፡እጃቸውን፡በርሱ፡ላይ፡ጭነው፡ያዙት።
47፤በአጠገብ፡ከቆሙት፡ግን፡አንዱ፡ሰይፉን፡መዞ፡የሊቀ፡ካህናቱን፡ባሪያ፡መታ፡ዦሮውንም፡ቈረጠ።
48፤ኢየሱስም፡መልሶ፦ወንበዴ፡እንደምትይዙ፡ሰይፍና፡ጐመድ፡ይዛችኹ፡ልትይዙኝ፡መጣችኹን፧
49፤በመቅደስ፡ዕለት፡ዕለት፡እያስተማርኹ፡ከእናንተ፡ጋራ፡ስኖር፡አልያዛችኹኝም፤ነገር፡ግን፥መጻሕፍት፡ይፈ ጸሙ፡ዘንድ፡ይህ፡ኾነ፡አላቸው።
50፤ዅሉም፡ትተውት፡ሸሹ።
51፤ዕርቃኑን፡በነጠላ፡የሸፈነ፡አንድ፡ጐበዝ፡ይከተለው፡ነበር፥
52፤ጐበዛዝቱም፡ያዙት፤ርሱ፡ግን፡ነጠላውን፡ትቶ፡ዕራቍቱን፡ሸሸ።
53፤ኢየሱስንም፡ወደ፡ሊቀ፡ካህናቱ፡ወሰዱት፥የካህናት፡አለቃዎችም፡ዅሉ፡ሽማግሌዎችም፡ጻፊዎችም፡ተሰበሰቡ።
54፤ጴጥሮስም፡እስከሊቀ፡ካህናቱ፡ግቢ፡ውስጥ፡በሩቁ፡ተከተለው፥ከሎሌዎችም፡ጋራ፡ተቀምጦ፡እሳት፡ይሞቅ፡ነበ ር።
55፤የካህናት፡አለቃዎችም፡ሸንጎውም፡ዅሉ፡እንዲገድሉት፡በኢየሱስ፡ላይ፡ምስክር፡ይፈልጉ፡ነበር፥አላገኙምም ፤
56፤ብዙዎች፡በሐሰት፡ይመሰክሩበት፡ነበርና፥ምስክርነታቸው፡ግን፡አልተሰማማም።
57-58፤ሰዎችም፡ተነሥተው፦እኔ፡ይህን፡በእጅ፡የተሠራውን፡ቤተ፡መቅደስ፡አፈርሰዋለኹ፡በሦስት፡ቀንም፡ሌላውን ፡በእጅ፡ያልተሠራውን፡እሠራለኹ፡ሲል፡ሰማነው፡ብለው፡በሐሰት፡መሰከሩበት።
59፤ምስክርነታቸውም፡እንዲሁ፡እንኳ፡አልተሰማማም።
60፤ሊቀ፡ካህናቱም፡በመካከላቸው፡ተነሥቶ፦አንዳች፡አትመልስምን፧እነዚህስ፡ባንተ፡ላይ፡የሚመሰክሩብኽ፡ምን ድር፡ነው፧ብሎ፡ኢየሱስን፡ጠየቀው።
61፤ርሱ፡ግን፡ዝም፡አለ፥አንዳችም፡አልመለሰም።ደግሞ፡ሊቀ፡ካህናቱ፡ጠየቀውና፦የቡሩክ፡ልጅ፡ክርስቶስ፡አን ተ፡ነኽን፧አለው።
62፤ኢየሱስም፦እኔ፡ነኝ፤የሰው፡ልጅም፡በኀይል፡ቀኝ፡ሲቀመጥ፡በሰማይም፡ደመና፡ሲመጣ፡ታያላችኹ፡አለ።
63፤ሊቀ፡ካህናቱም፡ልብሱን፡ቀደደና፦ከእንግዲህ፡ወዲህ፡ምስክሮችን፡ምን፡ያስፈልገናል፧
64፤ስድቡን፡ሰማችኹ፤ምን፡ይመስላችዃል፧አለ።እነርሱም፡ዅሉ፦ሞት፡ይገ፟ባ፟ዋል፡ብለው፡ፈረዱበት።
65፤አንዳንዶችም፡ይተፉበት፡ፊቱንም፡ሸፍነው፡ይጐስሙትና፦ትንቢት፡ተናገር፡ይሉት፡ዠመር፤ሎሌዎችም፡በጥፊ፡ እየመቱ፡ወሰዱት።
66፤ጴጥሮስም፡በግቢ፡ውስጥ፡ወደ፡ታች፡ሳለ፡ከሊቀ፡ካህናቱ፡ገረዶች፡አንዲቱ፡መጣች፥
67፤ጴጥሮስም፡እሳት፡ሲሞቅ፡አይታ፡ተመለከተችውና፦አንተ፡ደግሞ፡ከናዝሬቱ፡ከኢየሱስ፡ጋራ፡ነበርኽ፡አለችው ።
68፤ርሱ፡ግን፦የምትዪውን፡አላውቅም፡አላስተውልምም፡ብሎ፡ካደ።ወደ፡ውጭም፡ወደ፡ደጅ፡ወጣ፤ዶሮም፡ጮኸ።
69፤ገረዲቱም፡አይታው፡በዚያ፡ለቆሙት፦ይህም፡ከነርሱ፡ወገን፡ነው፡ስትል፡ኹለተኛ፡ትነግራቸው፡ዠመር።
70፤ርሱም፡ደግሞ፡ካደ።ጥቂት፡ቈይተውም፡በዚያ፡የቆሙት፡ዳግመኛ፡ጴጥሮስን፦የገሊላ፡ሰው፡ነኽና፥ከነርሱ፡ወ ገን፡በእውነት፡ነኽ፡አሉት።
71፤ርሱ፡ግን፦ይህን፡የምትሉትን፡ሰው፡አላውቀውም፡ብሎ፡ይረገምና፡ይምል፡ዠመር።ወዲያውም፡ዶሮ፡ኹለተኛ፡ጮ ኸ።
72፤ጴጥሮስንም፡ኢየሱስ፦ዶሮ፡ኹለት፡ጊዜ፡ሳይጮኽ፡ሦስት፡ጊዜ፡ትክደኛለኽ፡ያለው፡ቃል፡ትዝ፡አለው፤ነገሩን ም፡ዐስቦ፡አለቀሰ።
_______________የማርቆስ፡ወንጌል፥ምዕራፍ፡15።______________
ምዕራፍ፡15፤
1፤ወዲያውም፡ማለዳ፡የካህናት፡አለቃዎች፡ከሽማግሌዎችና፡ከጻፊዎች፡ከሸንጎውም፡ዅሉ፡ጋራ፡ከተማከሩ፡በዃላ፥ ኢየሱስን፡አሳስረው፡ወሰዱትና፡ለጲላጦስ፡አሳልፈው፡ሰጡት።
2፤ጲላጦስም፦አንተ፡የአይሁድ፡ንጉሥ፡ነኽን፧ብሎ፡ጠየቀው።ርሱም፦አንተ፡አልኽ፡ብሎ፡መለሰለት።
3፤የካህናት፡አለቃዎችም፡ብዙ፡ያሳጡት፡ነበር፤ርሱ፡ግን፡ምንም፡አልመለሰም።
4፤ጲላጦስም፡ደግሞ፦አንዳች፡አትመልስምን፧እንሆ፥በስንት፡ነገር፡ያሳጡኻል፡ብሎ፡ጠየቀው።
5፤ኢየሱስም፡ከዚያ፡በዃላ፡ጲላጦስ፡እስኪደነቅ፡ድረስ፡ምንም፡አልመለሰም።
6፤በዚያም፡በዓል፡የለመኑትን፡አንድ፡እስረኛ፡ይፈታላቸው፡ነበር።
7፤በዐመፅም፡ነፍስ፡ከገደሉት፡ከዐመፀኛዎች፡ጋራ፡የታሰረ፡በርባን፡የተባለ፡ነበረ።
8፤ሕዝቡም፡ወጥተው፡እንደ፡ልማዱ፡ያደርግላቸው፡ዘንድ፡እየጮኹ፡ይለምኑት፡ዠመር።
9፤ጲላጦስም፦የአይሁድን፡ንጉሥ፡እፈታላችኹ፡ዘንድ፡ትወዳላችኹን፧ብሎ፡መለሰላቸው፤
10፤የካህናት፡አለቃዎች፡በቅንአት፡አሳልፈው፡እንደ፡ሰጡት፡ያውቅ፡ነበርና።
11፤የካህናት፡አለቃዎች፡ግን፡በርባንን፡በርሱ፡ፈንታ፡ይፈታላቸው፡ዘንድ፡ሕዝቡን፡አወኳቸው።
12፤ጲላጦስም፡ዳግመኛ፡መልሶ፦እንግዲህ፡የአይሁድ፡ንጉሥ፡የምትሉትን፡ምን፡ላደርገው፡ትወዳላችኹ፧አላቸው።
13፤እነርሱም፡ዳግመኛ፦ስቀለው፡እያሉ፡ጮኹ።
14፤ጲላጦስም፦ምን፡ነው፧ያደረገው፡ክፋት፡ምንድር፡ነው፧አላቸው።እነርሱ፡ግን፦ስቀለው፡እያሉ፡ጩኸት፡አበዙ ።
15፤ጲላጦስም፡የሕዝቡን፡ፈቃድ፡ሊያደርግ፡ወዶ፡በርባንን፡ፈታላቸው፥ኢየሱስንም፡ገርፎ፡እንዲሰቀል፡አሳልፎ ፡ሰጠ።
16፤ወታደሮችም፡ፕራይቶሪዮን፡ወደሚባል፡ግቢ፡ውስጥ፡ወሰዱት፥ጭፍራውንም፡ዅሉ፡በአንድነት፡ጠሩ።
17፤ቀይ፡ልብስም፡አለበሱት፥የሾኽ፡አክሊልም፡ጐንጉነው፡ደፉበት፤
18፤የአይሁድ፡ንጉሥ፡ሆይ፥ሰላም፡ለአንተ፡ይኹን፡እያሉ፡እጅ፡ይነሡት፡ዠመር፤
19፤ራሱንም፡በመቃ፡መቱት፡ተፉበትም፥ተንበርክከውም፡ሰገዱለት።
20፤ከተዘባበቱበትም፡በዃላ፡ቀዩን፡ልብስ፡ገፈፉት፥ልብሱንም፡አለበሱት፥ሊሰቅሉትም፡ወሰዱት።
21፤አንድ፡መንገድ፡ዐላፊም፡የአሌክስንድሮስና፡የሩፎስ፡አባት፡ስምዖን፡የተባለ፡የቀሬና፡ሰው፡ከገጠር፡ሲመ ጣ፡መስቀሉን፡ይሸከም፡ዘንድ፡አስገደዱት።
22፤ትርጓሜውም፡የራስ፡ቅል፡ስፍራ፡ወደሚኾን፡ጎልጎታ፡ወደተባለ፡ስፍራ፡ወሰዱት።
23፤ከርቤም፡የተቀላቀለበትን፡የወይን፡ጠጅ፡እንዲጠጣ፡ሰጡት፤ርሱ፡ግን፡አልተቀበለም።
24፤ሰቀሉትም፥ልብሱንም፡ማን፡ማን፡እንዲወስድ፡ዕጣ፡ተጣጥለው፡ተካፈሉ።
25፤በሰቀሉትም፡ጊዜ፡ሦስት፡ሰዓት፡ነበረ።
26፤የክሱ፡ጽሕፈትም፦የአይሁድ፡ንጉሥ፡የሚል፡ተጽፎ፡ነበር።
27፤ከርሱም፡ጋራ፡ኹለት፡ወንበዴዎች፡አንዱን፡በቀኙ፡አንዱንም፡በግራው፡ሰቀሉ።
28፤መጽሐፍም፦ከዐመፀኛዎች፡ጋራ፡ተቈጠረ፡ያለው፡ተፈጸመ።
29፤የሚያልፉትም፡ራሳቸውን፡እየነቀነቁ፡ይሰድቡት፡ነበርና፦ዋ፥ቤተ፡መቅደስን፡የምታፈርስ፡በሦስት፡ቀንም፡ የምትሠራ፥
30፤ከመስቀል፡ወርደኽ፡ራስኽን፡አድን፡አሉ።
31፤እንዲሁም፡የካህናት፡አለቃዎች፡ደግሞ፡ከጻፊዎች፡ጋራ፡ርስ፡በርሳቸው፡እየተዘባበቱ፦ሌላዎችን፡አዳነ፤ራ ሱን፡ሊያድን፡አይችልም፤
32፤አይተን፡እናምን፡ዘንድ፡የእስራኤል፡ንጉሥ፡ክርስቶስ፡አኹን፡ከመስቀል፡ይውረድ፡አሉ።ከርሱም፡ጋራ፡የተ ሰቀሉት፡ይነቅፉት፡ነበር።
33፤ስድስት፡ሰዓትም፡በኾነ፡ጊዜ፥እስከ፡ዘጠኝ፡ሰዓት፡በምድር፡ዅሉ፡ላይ፡ጨለማ፡ኾነ።
34፤በዘጠኝ፡ሰዓትም፡ኢየሱስ፦ኤሎሄ፥ኤሎሄ፥ላማ፡ሰበቅታኒ፧ብሎ፡በታላቅ፡ድምፅ፡ጮኸ፤ትርጓሜውም፡አምላኬ፥ አምላኬ፥ለምን፡ተውኸኝ፧ማለት፡ነው።
35፤በዚያም፡ከቆሙት፡ሰዎች፡ሰምተው፦እንሆ፥ኤልያስን፡ይጠራል፡አሉ።
36፤አንዱም፡ሮጦ፡ሖምጣጤ፡በሰፍነግ፡ሞላ፡በመቃም፡አድርጎ።ተዉ፤ኤልያስ፡ሊያወርደው፡ይመጣ፡እንደ፡ኾነ፡እ ንይ፡እያለ፡አጠጣው።
37፤ኢየሱስም፡በታላቅ፡ድምፅ፡ጮኸ፡ነፍሱንም፡ሰጠ።
38፤የቤተ፡መቅደስም፡መጋረጃ፡ከላይ፡እስከ፡ታች፡ከኹለት፡ተቀደደ።
39፤በዚያም፡በአንጻሩ፡የቆመ፡የመቶ፡አለቃ፡እንደዚህ፡ጮኾ፡ነፍሱን፡እንደ፡ሰጠ፡ባየ፡ጊዜ፦ይህ፡ሰው፡በእው ነት፡የእግዚአብሔር፡ልጅ፡ነበረ፡አለ።
40-41፤ሴቶችም፡ደግሞ፡በሩቅ፡ኾነው፡ይመለከቱ፡ነበር፤ከነርሱም፡በገሊላ፡ሳለ፡ይከተሉትና፡ያገለግሉት፡የነበ ሩ፡መግደላዊት፡ማርያም፡የታናሹ፡ያዕቆብና፡የዮሳም፡እናት፡ማርያም፡ሰሎሜም፡ነበሩ፥ከርሱም፡ጋራ፡ወደ፡ኢየ ሩሳሌም፡የወጡ፡ሌላዎች፡ብዙዎች፡ሴቶች፡ነበሩ።
42፤አኹንም፡በመሸ፡ጊዜ፡የሰንበት፡ዋዜማ፡የኾነ፡የማዘጋጀት፡ቀን፡ስለ፡ነበረ፥የከበረ፡አማካሪ፡የኾነ፡የአ ርማትያስ፡ዮሴፍ፡መጣ፥
43፤ርሱም፡ደግሞ፡የእግዚአብሔርን፡መንግሥት፡ይጠባበቅ፡ነበር፤ደፍሮም፡ወደ፡ጲላጦስ፡ገባና፡የኢየሱስን፡ሥ ጋ፡ለመነው።
44፤ጲላጦስም፡አኹኑን፡እንዴት፡ሞተ፡ብሎ፡ተደነቀ፥የመቶ፡አለቃውንም፡ጠርቶ፡ከሞተ፡ቈይቷልን፧ብሎ፡ጠየቀው ፤
45፤ከመቶ፡አለቃውም፡ተረድቶ፡በድኑን፡ለዮሴፍ፡ሰጠው።
46፤በፍታም፡ገዝቶ፡አውርዶም፡በበፍታ፡ከፈነው፡ከአለትም፡በተወቀረ፡መቃብር፡አኖረው፥በመቃብሩ፡ደጃፍም፡ድ ንጋይ፡አንከባለለ።
47፤መግደላዊትም፡ማርያም፡የዮሳም፡እናት፡ማርያም፡ወዴት፡እንዳኖሩት፡ይመለከቱ፡ነበር።
_______________የማርቆስ፡ወንጌል፥ምዕራፍ፡16።______________
ምዕራፍ፡16፤
1፤ሰንበትም፡ካለፈ፡በዃላ፡መግደላዊት፡ማርያም፡የያዕቆብም፡እናት፡ማርያም፡ሰሎሜም፡መጥተው፡ሊቀቡት፡ሽቱ፡ ገዙ።
2፤ከሳምንቱም፡በፊተኛው፡ቀን፡እጅግ፡በማለዳ፡ፀሓይ፡ከወጣ፡በዃላ፡ወደ፡መቃብር፡መጡ።
3፤ርስ፡በርሳቸውም፦ድንጋዩን፡ከመቃብር፡ደጃፍ፡ማን፡ያንከባልልልናል፧ይባባሉ፡ነበር፤
4፤ድንጋዩ፡እጅግ፡ትልቅ፡ነበርና፤አሻቅበውም፡አይተው፡ድንጋዩ፡ተንከባሎ፡እንደ፡ነበር፡ተመለከቱ።
5፤ወደ፡መቃብሩም፡ገብተው፡ነጭ፡ልብስ፡የተጐናጸፈ፡ጕልማሳ፡በቀኝ፡በኩል፡ተቀምጦ፡አዩና፡ደነገጡ።
6፤ርሱ፡ግን፦አትደንግጡ፤የተሰቀለውን፡የናዝሬቱን፡ኢየሱስን፡ትፈልጋላችኹ፤ተነሥቷል፥በዚህ፡የለም፤እንሆ፥ ርሱን፡ያኖሩበት፡ስፍራ።
7፤ነገር፡ግን፥ኼዳችኹ፡ለደቀ፡መዛሙርቱ፡ለጴጥሮስም፦ወደ፡ገሊላ፡ይቀድማችዃል፤እንደ፡ነገራችኹ፡በዚያ፡ታዩ ታላችኹ፡ብላችኹ፡ንገሯቸው፡አላቸው።
8፤መንቀጥቀጥና፡መደንገጥ፡ይዟቸው፡ነበርና፥ወጥተው፡ከመቃብር፡ሸሹ፤ይፈሩ፡ነበርና፥ለማንም፡አንዳች፡አልነ ገሩም።እነርሱም፡ያዘዛቸውን፡ዅሉ፡ለጴጥሮስና፡ከርሱ፡ጋራ፡ላሉት፡በዐጪሩ፡ተናገሩ።ከዚህም፡በዃላ፡ኢየሱስ ፡ራሱ፡ለዘለዓለም፡ድኅነት፡የኾነውን፡የማይለወጠውን፡ቅዱስ፡ወንጌል፡ከፀሓይ፡መውጫ፡እስከ፡መጥለቂያው፡ድ ረስ፡በእጃቸው፡ላከው።
9፤ከሳምንቱም፡በመዠመሪያው፡ቀን፡ማልዶ፡በተነሣ፡ጊዜ፥አስቀድሞ፡ሰባት፡አጋንንት፡ላወጣላት፡ለመግደላዊት፡ ማርያም፡ታየ።
10፤ርሷ፡ኼዳ፡ከርሱ፡ጋራ፡ኾነው፡ለነበሩት፡ሲያዝኑና፡ሲያለቅሱ፡ሳሉ፡አወራችላቸው፤
11፤እነርሱም፡ሕያው፡እንደ፡ኾነ፡ለርሷም፡እንደ፡ታያት፡ሲሰሙ፡አላመኑም።
12፤ከዚህም፡በዃላ፡ከነርሱ፡ለኹለቱ፡ወደ፡ባላገር፡ሲኼዱ፡በመንገድ፡በሌላ፡መልክ፡ተገለጠ፤
13፤እነርሱም፡ኼደው፡ለሌላዎቹ፡አወሩ፤እነዚያንም፡ደግሞ፡አላመኗቸውም።
14፤ዃላም፡በማእዱ፡ተቀምጠው፡ሳሉ፡ለዐሥራ፡አንዱ፡ተገለጠ፥ተነሥቶም፡ያዩትን፡ስላላመኗቸው፡አለማመናቸውን ና፡የልባቸውን፡ጥንካሬ፡ነቀፈ።
15፤እንዲህም፡አላቸው፦ወደ፡ዓለም፡ዅሉ፡ኺዱ፥ወንጌልንም፡ለፍጥረት፡ዅሉ፡ስበኩ።
16፤ያመነ፡የተጠመቀም፡ይድናል፥ያላመነ፡ግን፡ይፈረድበታል።
17፤ያመኑትንም፡እነዚህ፡ምልክቶች፡ይከተሏቸዋል፤በስሜ፡አጋንንትን፡ያወጣሉ፤በዐዲስ፡ቋንቋ፡ይናገራሉ፤እባ ቦችን፡ይይዛሉ፥
18፤የሚገድልም፡ነገር፡ቢጠጡ፡አይጐዳቸውም፤እጃቸውን፡በድውዮች፡ላይ፡ይጭናሉ፡እነርሱም፡ይድናሉ።
19፤ጌታ፡ኢየሱስም፡ከነርሱ፡ጋራ፡ከተናገረ፡በዃላ፡ወደ፡ሰማይ፡ዐረገ፡በእግዚአብሔርም፡ቀኝ፡ተቀመጠ።
20፤እነርሱም፡ወጥተው፡በየስፍራው፡ዅሉ፡ሰበኩ፥ጌታም፡ከነርሱ፡ጋራ፡ይሠራ፡ነበር፥በሚከተሉትም፡ምልክቶች፡ ቃሉን፡ያጸና፡ነበር፨

http://www.gzamargna.net