ግእዝ ዐማር ኛ

ዋዜማ፡ሥርዐት

ቅጂ

ዜና

ግስ

ስሌት

ግእዝ-ዐማርኛ

ቀለም፡ቀንድ

ዋዜማ፡ሥርዐት•Wazéma System•Wazéma Système

ኢትዮጵያዊ፡የማስሊያ፡መጻፊያ፡ሥርዐት•Ethiopian Computer Writing System•système d'écriture informatique éthiopien

(to view the Amharic text, install the Wazéma Unicode fonts and set your browser’s default Ethiopic font)

Wazéma System•Wazéma Système

መርስዔ፡ሐዘን፡ወልደ፡ቂርቆስ፡(ብላታ)

•••

("ያማርኛ፡ሰዋስው"፥አርቲስቲክ፡ማተሚያ፡ቤት፥ዐዲስ፡አበባ፥፲፱፻፵፰፡ዓ.፡ም፥ገጽ፡215።)

•••

ሠምና፡ወርቅ።

ያማርኛ፡መዝሙር፥እንደ፡ግእዙ፡ቅኔ፥በሠምና፡በወርቅ፣በኅብርና፡በአንጻር፣...፡ይነገራል።ከዚህም፡የተነሣ፥'ያማርኛ፡ቅኔ'፡ተብሎ፡ይጠራል።የየስሞቹን፡ትርጓሜ፡በሚከተለ ው፡እናሳያለን።

ሠም፡ማለት፥ለወርቁ፡አምሳል፣መርገፍ፡ኾኖ፡የሚነገር፡ቃል፡ነው።

ወርቅ፡ማለት፥ቅኔው፡የሚደርስለት፡ዋናው፡ዐሳብ፡ነው።

ሠም፡ለበስ፡ማለት፥የቅኔው፡ዋና፡ዐሳብ፡(ወርቁ)፡ሳይገለጽ፥ምስጢሩ፡በሠሙ፡ብቻ፡የሚታወቀው፡ነው።

ወርቃ፡ወርቅ፡ማለት፥ቅኔው፥ያለምንም፡ምሳሌ፥በግልጽ፡የሚነገር፡ነው።

ኅብር፡የሚባለው፥አንዱ፡ቃል፡ሠሙንም፡ወርቁንም፡የሚያስተባብር፡ሲኾን፡ነው።

አንጻር፡የሚባለው፥ለምስጢሩ፡ተነጻጻሪ፡የሚኾን፡ሌላ፡ቃል፡የሚጠቀስለትና፡ምሳሌ፡ኾኖ፡የሚ ነገርለት፡ነው።

አፍራሽ፡የሚባለው፥አስቀድሞ፡የተነገረውን፡ዐሳብ፡ተከታዩ፡የሚለውጠው፡ሲኾን፡ነው።

ውስጠ፡ወይራ፡የሚባለው፥ኀይለ፡ቃሉ፡በሠሙ፡ተሰውሮ፡ለኅሊና፡የሚሰማ፡ሲኾን፡ነው።

የቅኔ፡መንገድ፡ከነዚህም፡ሌላ፥ልዩ፡ልዩ፡ስልቶች፡አሉት።ዳሩ፡ግን፥ውሳኔን፡ማብዛት፡ተማሪ ን፡ማታከት፡ይኾናልና፥እነዚህ፡ይበቃሉ፡ብለን፡እናቆማለን።እነርሱም፥ርስ፡በራሳቸው፥እየተ ዛመዱ፡ሲገቡ፡ይገኛሉ።ይልቁንም፥ኅብርና፡ውስጠ፡ወይራ፡ከዅሉ፡ይገኛሉ።

እንሆ፥ዅሉንም፡በሚከተሉት፡ማስረጃዎች፡እናሳያለን።

 

1፤ሠምና፡ወርቅ፥ያማርኛ፡ቅኔ።

(ሀ)

ወላድ፡ኢትዮጵያ፡/፡ለልጆቿ፡ብላ፥

እጅግ፡ሳይጥሩባት፥/፡ሳይዘሯት፡አብቅላ፥

ስንዴውን፡ጠብቃ፥/፡እንክርዳዱን፡ነቅላ፥

ስትመግበን፡አየን፡/፡በፀሓይ፡አብስላ።

ምሳሌ፡ዘር፡ሀገራችን፥

ንጹሕ፡ዝናም፡መንግሥታችን።(አዝማች)

(ዮፍታሔ፡ንጉሤ።)

(ለ)

ልጅነት፡የያዘው፡/፡ምላሳችን፡መንካ፥

ከቋንቋችን፡በፊት፡/፡ሌላ፡ቋንቋ፡አይንካ፤

ግእዝ፡ካማርኛ፡/፡አስተባብሮ፡ሲያውቅ፥

ከውጭ፡አገር፡ቋንቋ፡/፡ያን፡ጊዜ፡ይንጠቅ።

(አ.፡ኪዳነ፡ወልድ፡ክፍሌ።)

2፤ሠም፡ለበስ፡ያማርኛ፡ቅኔ፤

(ሀ)

ሰፌድና፡ወንፊት፡/፡እያለ፡በጃችን፥

ያልተነፋ፡ዱቄት፡/፡ምነው፡ማቡካታችን፧

(አ.፡ኪዳነ፡ወልድ፡ክፍሌ።)

(ለ)

ያ፡ማዶ፡ተራራ፡/፡ረዥም፡ነው፡በጣም፤

በከብት፡ነው፡እንጂ፡/፡በእግር፡አያስወጣም።

ያ፡ልጅ፡ተራራውን፡/፡ሊወጣ፡ያስባል፤

ዐዋቂ፡ሲያቅተው፡/፡ድኾ፡እንዴት፡ይዘልቃል።

(ማኅተመ፡ወርቅ፡እሸቴ።)

 

3፤ሠም፡ለበስ፡ውስጠ፡ወይራ።

(ሀ)

ተስቦ፡ገብቷል፡/፡ከቤታችን፤

መቼ፡ይወጣል፡/፡በሽታችን፧

(ዮፍታሔ፡ንጉሤ፥፲፱፻፴፫፡ዓ.ም.።)

(ለ)

እምቢልታ፡መለከት፡/፡የሚሰማው፡የት፡ነው፧

አንዱም፡በስርቆሽ፡በር፥/፡አንዱም፡በግቢ፡ነው።

(ማኅተመ፡ወርቅ፡እሸቴ፥፲፱፻፳፯፡ዓ.ም.።)

(ሐ)

(ጥያቄ)

ሰንበቴያችን፡ደርሶ፥/፡ድግስ፡አለብን፤

እንድትረጂኝ፡ይኹን፡/፡እኽል፡ቅመሙን።

(ምላሽ)

እሺ፥ምን፡ቸገረኝ፥/፡ያለኝ፡ጕልበቴን፤

ለምለም፡ወጥቤታችን፡/፡ታውቃለች፡ምጥን፤

እኛ፡ነጭ፡አዝሙዱን፡/፡እንችላለን፤

አንተ፡ጥቍር፡ቅመም፡/፡አበሱዳን፡ኹን።

(ዮፍታሔ፡ንጉሤ፥፲፱፻፳፩፡ዓ.ም.።)

 

4፤ወርቃ፡ወርቅ፡ያማርኛ፡ቅኔ።

(ሀ)

ዐጥንቱን፡ልልቀመው፡/፡መቃብር፡ቈፍሬ፤

ጎበናን፡ከሸዋ፥/አሉላን፡ተትግሬ፤

ስመኝ፡ዐድሬያለኹ፡/ትናንትና፡ዛሬ፥

አሉላን፡ለጥይት፥/፡ጎበናን፡ለጭሬ።

ተሰበሰቡና፡/፡ተማማሉ፡ማላ፤

አሉላ፡ተትግሬ፥/፡ጎበና፡ተጋላ።

ጎበና፡ሴት፡ልጁን፡/፡ሊያስተምር፡ፈረስ፤

አሉላ፡ሴት፡ልጁን፡/፡ጥይት፡ሊያስተኵስ።

አገሬ፡ተባብራ፡/፡ታልረገጠች፡ርካብ፥

ነገራችን፡ዅሉ፡/፡የእንቧይ፡ካብ፥የእንቧይ፡ካብ።

ትምህርት፡እንዲሰፋ፥/፡ጕልበት፡እንዲጠና፥

አራቱ፡ጉባኤ፡/፡ይነሡልንና፥

መኰንን፣ደረሶ፣/፡አሉላ፣ጎበና፥

አገራችን፡ትማር፡/፡አኹን፡እንደገና፤

ጎበና፥ከፈረስኽ፡ጋራ፡ተነሥ፡እንደገና።(አዝማች)

(ዮፍታሔ፡ንጉሤ፥፲፱፻፳፯፡ዓ.ም.።)

[…]

 

5፤ኅብር፡ያማርኛ፡ቅኔ።

(ሀ)

አኹን፡ምን፡ይጠቅማል፡/፡ሱሰኛ፡መኾን፧

ብዙ፡ቤት፡ፈረሰ፡/፡ትናንት፡በዚያ፡ቡን።

(ማኅተመ፡ወርቅ፡እሸቴ፥፲፱፻፳፩፡ዓ.ም.።)

(ለ)

ቍርሳችን፡እንጦጦ፥/፡ምሳችን፡አባይ፤

ሻይ፡ግብዣችን፡ዳሞት፥/፡ቡሬ፡አደባባይ፤

ራታችን፡ጎንደር፥/፡አጣጣሚ፡ላይ፤

ኦቶሞቢላችን፡/፡ላንቻይደለሞይ፧

(ዮፍታሔ፡ንጉሤ፥፲፱፻፴፭፡ዓ.ም.።)

(ሐ)

እግረኛ፡እንዳይኾን፡/፡ይኸ፡ውጋዴን፥

ጊዜው፡ሳያልፍበት፡/፡በደጉ፡ዘመን፥

ከሕግ፡ቤት፡ገብቶ፡/፡ምነው፡ቢወሰን፧

(ደራሲው፡መርስዔ፡ሐዘን፡ወልደ፡ቂርቆስ፥፲፱፻፳፬፡ዓ.ም.።)

 

6፤አንጻር፡ያማርኛ፡ቅኔ።

(ሀ)

ወዳጅ፡ማለት፡ዐብሮ፡/፡ሲባክን፡ነው፡እንጂ፧

እንደ፡ዐይን፣እንደ፡ዦሮ፥/፡እንደ፡እግር፣እንደ፡እጅ፧

(ለ)

የኔንም፡ጐዦ፡ቈጠሩሽ፤

እንደ፡ሰው፡አዳራሽ።

 

7፤አፍራሽ፡ያማርኛ፡ቅኔ።

(ሀ)

ማሳለፍማ፡ታውቃለኽ፤

አትሰጥም፡እንጂ፡ተጠላኽ።

(ማኅተመ፡ወርቅ፡እሸቴ።)

(ለ)

እምዬ፡ምኒልክ፡/፡በቅሎ፡ስጠኝ፡ብዬ፡/፡እኔ፡አልለምንኽም፤

ካባ፡ስጠኝ፡ብዬ፡/፡እኔ፡አልለምንኽም፤

ብርም፡ስጠኝ፡ብዬ፡/፡እኔ፡አልለምንኽም፤

አምና፡ነበር፡እንጂ፥/፡ዘንድሮ፡የለኽም።

(ይህ፡ግጥም፡የተገጠመው፥የዐፄ፡ምኒልክ፡መሞት፡ተደብቆ፡ሳለ፥ባ፲፱፻፯፡ዓ.ም.፡ነው።)

 

8፤ውስጠ፡ወይራ፡ያማርኛ፡ቅኔ።

(ሀ)

ማሽላና፡ስንዴ፡/፡ባንድ፡ዐብረን፡ስንቈላ፥

እያረረ፡ሣቀ፡/፡የባሕር፡ማሽላ።

ከሰል፡የሚኾኑ፡/፡ብዙ፡ዕንጨቶች፡ሳሉ፥

ዝግባ፡ለምን፡ይኾን፡/፡ይቈረጥ፡የሚሉ፧

(ዮፍታሔ፡ንጉሤ፥፲፱፻፳፬፡ዓ.ም.።)

 

(ለ)

አብርሃም፡ቢጣላ፣/፡ከሣራ፡ከሚስቱ፥

ባሪያውን፡አጋርን፡/፡አስወጣት፡ከቤቱ።

በዚህም፡ተጣልተው፥/፡ወጡ፡አደባባይ፤

ዳኛውም፡ፈረደ፡/፡በኹለቱም፡ላይ።

አንተም፡ሠርተኽ፡ብላ፤/፡አንቺም፡ሠርተሽ፡ብዪ፤

አላጋር፡እንጀራ፡/፡አይበላም፡ወይ፧

(ወልደ፡ጻድቅ፡ጋሼ፥፲፱፻፳፡ዓ.ም.።)

 

 

http://www.gzamargna.net

s_t_qq3

ግጥም
ድርሰት
ቅኔ፡ዜማ
ተረትና፡ምሳሌ

ቅኔ፡ዜማ

አድማሱ፡ጀንበሬ
አፈ፡ወርቅ፡ዘውዴ
ገላነሽ፡ሐዲስ
ጥዑመ፡ልሳን፡ካሳ
መርስዔ፡ሐዘን፡ወልደ፡ቂርቆስ
ዓለማየኹ፡ሞገስ
ተገኝ፡ታምሩ