ግእዝ ዐማር ኛ

ራስ፡አበበ፡አረጋይ

•••

ላገር፡ፍቅር፡ማኅበር፡ጉባኤ፡የተናገሩት፡ቃል፤

ዐዲስ፡አበባ፥ሐምሌ፡፲፱፡ቀን፥፲፱፻፴፬፡ዓ.ም.።

•••

በመላው፡ኢትዮጵያ፥ክርስቲያን፡እስላም፥ዐማራ፡ጋላ፡ሳይል፥ሴትና፡ሕፃን፡ሳይለይ፥ዐምስት፡ዓመት፡ሙሉ ፡የወረደውን፡መከራና፡ሥቃይ፥ስንኳንስ፡ከቤታቸው፡ወጥተው፡እንዳራዊት፡በዱር፡በገደል፡የተቀመጡት፡ዐ ርበኞች፡ይቅሩና፥ማናቸውም፡ኢትዮጵያዊ፡የኾነ፡ሰው፡ዅሉ፥ከቶ፡በፍጹም፡የማይረሳው፥ለልጅ፡ልጅ፡ጽፎ፡ የሚያስተላልፈው፡ነው።

ያምስት፡ዓመት፡መከራ፡ብዬ፡ስናገር፥የትላንትናውን፡የቅርቡን፡ሥቃያችንን፡ለመናገር፡ነው፡እንጂ፥ግፈ ኛው፡ጠላታችን፥ሐማሴንን፡በመያዙ፥ወንድሞቻችን፡ኤርትራውያን፡በጠላት፡እጅ፡ተጨቍነው፡ሥቃይ፡ሲቀበሉ ፥ኀምሳ፡ዓመታቸው፡ነው።

ያልፋል፡ተብሎ፡ባልታሰበው፡በዚያ፡በመከራ፡ጊዜያት፥ያላንድ፡ምክንያት፡እንዲያው፡በግፍ፡እንደ፡ጐርፍ ፡የፈሰሰው፡የኢትዮጵያ፡ሕዝብ፡ደም፥ዳኝነት፡ገንዘቡ፡በኾነ፡በእግዚአብሔር፡ፊት፡በመጮኹ፥ኢትዮጵያ፡ ዳኝነት፡አግኝታ፥ይኸው፡ከዚያ፡ቀን፡ዠምሮ፡የጠላታችን፡ደም፡በተራው፡ሳያቋርጥ፡መፍሰሱን፡እናያለን። "ኢትዮጵያ፡ርስቴ፡ናት"፡ብሎ፡ብዙ፡ሚልያርድ፡ገንዘብ፡አውጥቶ፡በሠራው፡ቤት፡ሳይቀመጥበት፥በሠራው፡ሥ ራ፡ሳይጠቀምበት፡መኼዱን፡አሳየን።"ንጉሥ"፡ተብሎ፡የመጣው፡እንኳ፡ዱካ፡ዳዎስታ፡ሳይቀር፥በወዳጆቻችን ፡በንግሊዞች፡እጅ፡ታስሮ፡ሳለ፡መሞቱን፡አሰማን።

በደጉ፡ንጉሣችን፡ብርታትና፡በእግዚአብሔር፡ቸርነት፡ያ፡ዅሉ፡ግፍና፡በደል፡ዐልፎ፥ዛሬ፡እንደዚህ፡አን ድነት፡ለመሰ፟ብሰብ፡ስላበቃን፡ሳናቋርጥ፡እግዚአብሔርን፡እናመስግነው።

ይህም፡ዅሉ፡መከራ፡የደረሰብን፡ምክንያት፥ኢትዮጵያ፥ቈንዦዋ፡አገራችን፥በተፈጥሮዋ፡ለምለምና፡ሀብታም ፡በመኾኗ፥ጠላታችን፡ጣሊያን፥ከብዙ፡ጊዜ፡ዠምሮ፡ይፈልጋት፡ስለ፡ነበረ፡ነው።ለመውረርም፡በመጣ፡ቍጥር ፥ባርበኞቻችን፡ኀይል፡ድል፡እየተመታ፡እንደ፡ተመለሰ፡የኢትዮጵያ፡ታሪክ፡በሰፊው፡ይናገረዋል።

የታወቀው፡ጥንታዊው፡ጠላታችን፥የኢትዮጵያ፡ልምላሜና፡መልካምነት፡በሕልሙም፡በውኑም፡እየታየው፡ዕረፍ ት፡ስላሳጣው፥ኢትዮጵያን፡ለመውረሪያ፡ብዙ፡መሣሪያ፡ኀምሳ፡ዓመት፡ሙሉ፡ሲቀጠቅጥ፡ኖረ።ነገር፡ግን፥እ ግዚአብሔር፡ኢትዮጵያን፡ስላልጠላት፥ጣሊያን፡እኛን፡ሊያጠፋ፡በተዘጋጀበት፡ዘመን፥በጦር፡አደባባይ፡ተ ዋግቶ፡ድል፡የሚመታ፥በፍርድ፡አደባባይ፡ተሟግቶ፡የሚረታ፡ኀይል፡የተሰጣቸውን፡ግርማዊ፡ቀዳማዊ፡ኀይለ ፡ሥላሴን፡ያኽል፡ጋሻና፡ጠባቂ፡ሰጠን።በዚህ፡ምክንያት፥ጠላት፡ኢትዮጵያን፡እንዳይወራት፡በብዙ፡ወገን ፡ደከሙልን።

ጠላታችንም፡እኛን፡ለማጥፋት፡አንድ፡ጊዜ፡ተዘጋጅቷልና፥በግፍ፡ሊያጠፋን፡ቈርጦ፡ተነሣ።ጦርነቱንም፡ከ መዠመሩ፡አስቀድሞ፥ያንድ፡ሕዝብ፡ዓይነተኛው፡ጕልበቱ፡ኅብረት፣አንድነት፡ስለ፡ኾነ፥ፍቅር፡የምናጣበት ን፥አንድነታችን፡የሚለያይበትን፥ጕልበታችን፡የሚበታተንበትን፡የተንኰልና፡የስብከት፡መርዝ፡በመካከላ ችን፡እየነዛ፥ሎሌ፡ከጌታው፥ልጅ፡ከናት፡ካባቱ፥ወንድም፡ከወንድሙ፥ወገን፡ከወገኑ፡እንዲለያይ፡መሥራት ፡ዠመረ።

ይህን፡ፖለቲካውን፡የጦር፡ፊታውራሪና፡ዋና፡መሣሪያ፡አድርጎ፥ቀጥሎ፥ባረመኔነትና፡በጨካኝነት፡በጋዝና ፡በመርዝ፡ጪስ፥ባይሮፕላንና፡በታንክ፡ወጋን፤ያን፡ጊዜም፥ንጉሠ፡ነገሥታችን፥እንዳንድ፡ወታደር፡ኾነው ፥የጦር፡ልብስ፡ለብሰው፥የጦር፡ገበሬ፡ኾነው፡ስላገራቸውና፡ስለ፡ነጻነታቸው፡እስከ፡መጨረሻው፡ተዋጉ።

ነገር፡ግን፥ሕዝባቸው፥የዓለም፡ዅሉ፡ሕግ፡በከለከለው፡መሣሪያ፡በመርዝ፡ጪስ፡የሚያልቅባቸው፡ቢኾን፥የ ጦር፡መሣሪያና፡ፍርድ፡ለመጠየቅ፡ወደ፡ዓለም፡መንግሥታት፡ወዳውሮፓ፡ኼዱ።ሲኼዱም፥በኢትዮጵያ፡በረሓ፡ ውስጥ፥ዐርበኞች፡ለመፍጠር፡የቻለውን፡ቃላቸውን፡ስለ፡ሰጡን፥ዐምስት፡ዓመት፡ሙሉ፡ዠግናው፣ዐርበኛው፡ ሕዝባቸው፦የተፈሪ፣የጠቅል፡አሽከር!፡እያለ፡በስማቸው፡የጠላትን፡ጕልበት፡ማድከምና፡ማመንመን፡ቻለ።የንጉሠ፡ነገሥቱን፡ፍቅር፡ያገር፡ር ቀት፡ሳይከለክለው፥ዐርበኛው፡ሕዝባቸው፥ጧት፡ማታ፡በሐሳብና፡በፍቅር፥በእግረ፡ልቡና፡ከንጉሠ፡ነገሥቱ ፡ጋራ፡እየተገናኘ፥የሚያረጋጋና፡የሚያበረታታ፡ረድኤት፡ያለማቋረጥ፡ከግርማዊነታቸው፡በቃልም፡በደብዳ ቤም፡እየተቀበለ፥በኢትዮጵያ፡በረሓ፡የተሰራጨው፡ዐርበኛው፡ዅሉ፡በሃይማኖቱና፡በተጋድሎው፡ተበራታ።

የኢትዮጵያም፡ነጻነት፡እንዲመለስ፡ተስፋ፡ያደርግ፡የነበረው፥በጠቅላላው፡የኢትዮጵያ፡ሕዝብ፥ላርበኛው ፡ሥንቅ፡በማቀበልና፡ምስጢር፡በማካፈል፥በሌላውም፡አስፈላጊ፡በኾነው፡ልዩ፡ልዩ፡ርዳታ፡በማድረጉ፥ዐር በኛው፡የተጋድሎ፡ሥራውን፡ለመቀጠል፡ቻለ።ጠላትም፡ተከተማ፡ወደ፡ውጭ፡መውጫ፡መሰናዘሪያ፡መንገድ፡ዐጣ ።

እንደምታውቁት፥ጠላታችን፡ዅላችንንም፡እጁ፡ለማግባት፥ከጦርነቱ፡በቀር፥በፖለቲካና፡በልዩ፡ልዩ፥ስብከ ት፡እያደረገ፡ወጋን።ነገር፡ግን፥ስላገሩና፡ስለ፡ንጉሡ፡ፍቅር፡በሞቱ፡ቈርጦ፡የተነሣው፡ዐርበኛ፡አልተ በገረለትም።ከቶውንም፡ዅሉም፡ባገሩ፡ፍቅር፡ተቃጠለ፤ሕይወቱንም፡ለሞት፡አሳልፎ፡ሰጠ።ይልቁንም፥ግርማ ዊ፡ጃንሆይ፥ስለ፡ሕዝባቸውና፡ስለ፡ኢትዮጵያ፡ነጻነት፡በሎንዶንና፡በዠኔቭ፥በዓለም፡ማኅበር፡የሚሠሩል ንና፡የሚደክሙልን፡ሥራ፡ወሬው፡እየደረሰን፥ይህ፡መልካም፡ተጋድሏቸው፡ከኛ፡ጋራ፡ኾኖ፡ኀይል፡እየሰጠን ፡የገነፈለ፡ተስፋ፡ያሳድርብን፡ስለ፡ነበረ፥ጠላት፡ከኢትዮጵያ፡በጭራሽ፡እንዲጠፋ፡የታመነ፡ነገር፡ኾኖ ፥ቃላቸውና፡ፍቅራቸው፡በማይደብስ፡ቀለም፡በኢትዮጵያ፡ሕዝብ፡ልብ፡ስለ፡ተጻፈ፥ዐርበኛው፡በደሙ፥ስደተ ኛው፡በጋለ፡ዐሳቡ፥የዳማው፡በሐዘኑ፥ገበሬው፡በኽሉ፥ነጋዴው፡በወርቁ፥ዅሉም፡በያለበት፡መረዳዳት፡ያዘ ።

ኢትዮጵያ፡ከሞት፡ለመነሣት፥ነጻነቷን፡ለማግኘት፡የቻለችው፥ግርማዊ፡ቀዳማዊ፡ኀይል፡ሥላሴ፡ወዳውሮፓ፡ ኼደው፥ያ53፡መንግሥታት፡ዐይን፡እየገረፋቸው፡ፍርድ፡ተቀብለው፥ረዳት፡ጦር፡ይዘውልን፡ስለ፡መጡ፡ነው ።

ዐምስት፡ዓመት፡ሙሉ፡በስማቸው፡ስንከላከል፡ቈይተን፥ባምስተኛው፡ዓመት፡በኢትዮጵያ፡ሰሜን፡ምዕራብ፡የ ነጻነትን፡ሰንደቅ፡ዓላማ፡ይዘው፡ብቅ፡ባሉ፡ጊዜ፥ጠላት፡መድረሻ፡ዐጣ፤ያርበኞቻችን፡ኀይል፡ታደሰ፤ብድ ር፡ተመለሰ፤የግፉ፡መስፈሪያ፡ቍና፡ተቀደደ።

ዛሬ፡ብዙ፡ነገሥታት፡በጠላት፡እጅ፡ተጠቅተው፥ተጨቍነው፥ነጻነት፡ዐጥተው፥ለሕግና፡ለሰው፡ነጻነት፡ከሚ ከላከለው፡ከንግሊዝ፡መንግሥት፡ርዳታ፡ለማግኘት፡ሎንዶን፡ላይ፡ኾነው፡ይጠባበቃሉ።

እኛ፡ግን፥ከወደቅን፡በኋላ፡ተነሥተን፡ደስ፡እንዳለን፡ዅሉ፥እንዚህም፡የተጨነቁት፡ነገሥታት፥የኛ፡ዕጣ ፡ደርሷቸው፡ነጻነታቸውን፡አግኝተው፥ለርስታቸውና፡ላገራቸው፡ባለቤት፡እንዲኾኑ፡እግዚአብሔርን፡እንለ ምናለን።

ከዚህ፡ቀጥሎ፥ስላንድነትና፡ስለ፡መተባበር፡አመለክታችዃለኹ።ከዅሉ፡አስቀድሞ፥እላይ፡እንደ፡ተናገርኹ ት፥ያንድ፡መንግሥት፡ሕዝብ፥ነጻነቱ፡የሚጠበቀው፥በጠላት፡የማይደፈረው፥አንድነት፡የሚባለው፡መሣሪያ፡ ሲኖረው፡ነው።ጠላታችን፡ጣሊያንም፥ይኸንኑ፡መሠረት፡አድርጎ፥የኢትዮጵያ፡ሕዝብ፡ስለ፡ነጻነቱ፡በያለበ ት፡እየተዋጋ፡ስላስቸገረው፥ባላገሩን፡ካርበኛው፥ዐርበኛውን፡ከንጉሡ፥ንጉሡን፡ከሕዝቡ፡ለመለያየት፥ል ዩ፡ልዩ፡የፖለቲካና፡የተንኰል፡ሥራ፡አደረገ።

መዠመሪያ፥ባላገሩን፦ላርበኞች፡ሥንቅ፡አትስጥ፡እያለ፡ሽልማትም፡ገንዘብም፡ሰጠ፤አልኾነለትም።

ኹለተኛ፤ዐርበኞችን፦ንጉሣችኹ፡አይመለሱም፤ባውሮፓ፡ለመኖር፡ቈርጠዋል።ጦርነቱን፡ትታችኹ፡ወደኛ፡ብት ገቡ፡ይሻላል፡እያለ፥በፖለቲካና፡በገንዘብ፡ቢያባብላቸው፥ለነጻነታቸው፡የሚታገሉት፡ዠግኖች፡ኢትዮጵያ ውያን፡ሳይበገሩ፡ቀሩ።

ሦስተኛ፤የድፍረቱ፡ድፍረት፥ደጉ፡ንጉሣችንን፥ቀዳማዊ፡ኀይል፡ሥላሴን፦ሲኾን፡አገርዎ፡ተመልሰው፡ይግቡ ፤አለዚያም፡ንጉሥነቴን፡ትቻለኹ፤ፍርድ፡አልጠይቅም፡ብለው፡አውሮፓ፡ይቀመጡ።ስለዚሁም፡የጣሊያን፡መን ግሥት፥ለርስዎም፡ለልጆችዎም፥በሚልዮን፡የሚቈጠር፡ቀለብ፡እንሰጥዎታለን፡ብሎ፡ቢለምናቸው፦እኔ፡ወዳው ሮፓ፡የመጣኹት፡ሕዝቤንና፡አገሬን፡ነጻ፡ለማውጣት፡ነው፡እንጂ፥ለመሸጥና፡ጥቅሜን፡ለመፈለግ፡አይደለም ፤ኢትዮጵያውያንን፡እንደዚህ፡ያለ፡ወጥመድ፡ከማግባት፡እኔ፡በችግር፡መሞቴን፡እመርጣለኹ፡ብለው፡ስለ፡ መለሱለት፡ኀፍረቱ፡ታላቅ፡ኾነ።

ይህ፡ዅሉ፥እኛን፡ርስ፡በርሳችን፡አለያይቶ፥ከመካከላችን፡ቀዳዳ፡ፈልጎ፡ሐሳቡን፡ለመፈጸም፡ነበር፤ነገ ር፡ግን፥በማናቸውም፡አልተሳካለትም።ብዙ፡ዐርበኞች፡ለንጉሣቸውና፡ላገራቸው፡እንደ፡ቅጠል፡ረገፉ፤የባ ላገሩም፡ደም፡እንደ፡ጐርፍ፡ፈሰሰ።

በኢትዮጵያ፡አውራጃ፡ውስጥ፥እስላም፡ክርስቲያን፥ሱማሌ፡ጋላ፡ሳይባል፥ዅሉም፡መከራውን፡ተካፈለ።ለምሳ ሌ፥በጐዣም፡በኩል፡ስንመለከት፥ደማቸውን፡ያፈሰሱ፥አኹንም፡የሚያኰሩ፡ብዙ፡ዐርበኞች፡እናያለን፤እንደ ዚሁም፡በትግሬ፥በጎንደር፥በሸዋ፥ከክርስቲያንም፡ኾነ፡ከስላም፡ለነጻነታቸው፡ባለፈው፡ደማቸውን፡ያፈሰ ሱ፡ወደ፡ፊትም፡ኢትዮጵያን፡የሚያኰሯት፡መመኪያዎች፡አሏት።

ደግሞ፥ካምሳ፡ዓመት፡ዠምሮ፡መከራ፡የተቀበሉትን፡ወንድሞቻችንን፡ያማሴንን፡ሰዎች፡ስንመለከት፥ብዙዎቹ ፡ስለ፡ኢትዮጵያ፡ነጻነት፡በጦር፡ሜዳ፡ላይ፡ያገር፡መሥዋዕት፡ኾነዋል።ለምሳሌ፥እነ፡ቀኛዝማች፡ሰለባ፡ ወልደ፡ሥላሴ፥እነቀኛዝማች፡አሰፋ፡ባሕታ፥እነቀኛዝማች፡አንዶም፥እነቀኛዝማች፡ጸጋዬና፡ግራዝማች፡ሐጎ ስ፡ጉኡላይ፥ባላምባራስ፡ዘውዱ፡ተድላ፥ባላምባራስ፡ስብሐቱ፡ተድላ፥ቀኛዝማች፡አብርሃ፡ገብረ፡ኢየሱስ፥ ፊታውራሪ፡ጣሰው፡ገብረ፡ኢየሱስ፥ቀኛዝማች፡ወልደ፡አብ፡እዝጊ፡ክፍሉ፥ባላምባራስ፡ካሕሳይ፡አሰፋ፡ናቸ ው።

እንደዚሁም፡ስላገራቸው፡ደማቸውን፡ያፈሰሱ፡ከሱማሌዎችም፡ከጋሎችም፡ታላላቅ፡ዠግኖች፡አሉ።

የዚህን፡በግፍ፡የፈሰሰውን፡የወንደሞቻችንን፡የሰማዕታት፡ደም፡ስናስበው፡እጅግ፡እናዝናለን፤ደስም፡ይ ለናል።

የምናዝነው፥የተቀበሉት፡መከራና፡የደረሰባቸው፡ሥቃይ፡ትዝ፡እያለን፡ነው።ደስ፡የሚለን፡ግን፥ደማቸው፡ ነጻነትን፡ያኽል፡ፍሬ፡ስላፈራልን፡ነው።

ነገር፡ግን፥የነዚህ፡የዠግኖች፡የሰማዕታት፡ደም፡በኢትዮጵያ፡ሕዝብ፡ልብ፡ዅሉ፡እንደ፡ታላቅ፡ሐውልት፡ ተተክሎ፡ስለሚያበራ፥ዋጋቸው፡እጅግ፡ከፍ፡ያለ፡ስለ፡ኾነ፥የታደሉ፡ናቸው።

እኛም፡ወደ፡ፊት፥የኢትዮጵያን፡ነጻነት፡የሚደፍረ፡ጠላት፡ቢመጣ፥በደማችን፡ነጻነታችንን፡ለመጠበቅ፡ዕ ድላችን፡እንደነሡ፡መኾኑ፡አይጠረጠርም።

በንጉሣችን፡ስም፡ዐምስት፡ዓመት፡ስንዋጋ፥ጠላት፡ያልበገረን፥ዛሬማ፡መሪያችን፡ንጉሠ፡ነገሥታችን፡በመ ካከላችን፡በታላቅ፡ግርማ፡ሳሉልን፡ማነው፡የሚደፍረን።ነጻነታችንና፡አንድነታችን፡የጸና፡ኾኗል።ለሕዝ ብ፡ሃይማኖቱ፡ላገሩ፡ለንጉሡ፡መሞቱ፡ስለ፡ኾነ፥ለውድ፡አገሩና፡ለነጻነቱ፡ደሙን፡ነሚነፍግ፡የለም።

ውድ፡አገራችንን፡በታላቁ፡እግዚአብሔር፡ቸርነት፥በንጉሠ፡ነገሥታችን፡ብርታት፡ጨብጠን፡ይዘናታልና፥እ ስላምም፡ክርስቲያንም፡አንድነት፡ተባብረን፡ስላገራችን፡እንሥራ።አገርና፡ንጉሥ፡ቢኖረን፡ተሰበሰብን፤ ነጻነትን፡ብናገኝ፥እንደ፡ልብ፡ለመናገር፡ቻልን።በዚያ፡በመከራው፡ዘመን፥ዐርበኞች፡በበረሓ፥ስደተኞች ፡በስደት፡አገር፥እስረኞች፡በወህኒ፡ቤት፥ረዳታችንም፡ባላገር፡በሥቃይ፡ውስጥ፡ኾኖ፥ዅሉም፡ባንድ፡ሐሳ ብ፡ያስብ፡የነበረው፡ይኸን፡ያየነውን፡ዓለም፡ለማግኘት፡ነበርና፥አኹን፡ይኸንኑ፡ስላገኘነው፡ለእግዚአ ብሔር፡ምስጋና፡ስናቀርብ፡ለደስታችን፡ወሰን፡የለውም።

ዕድሜ፡ለግርማዊ፡ንጉሠ፡ነገሥታችን።

ኢትዮጵያ፡በነጻነት፡ለዘላለም፡ትኑር።

http://www.gzamargna.net

ግጥም
ድርሰት
ቅኔ፡ዜማ
ተረትና፡ምሳሌ፡(ይዘጋጃል)

ድርሰት

• አበበ፡አረጋይ
• የኢትዮጵያ፡ኦርቶዶክስ፡ተዋሕዶ፡ቤተ፡ ክርስቲያን
• ኤርምያስ፡ከበደ፡ወልደ፡ኢየሱስ
• በዓሉ፡ግርማ
• ገብረ፡ሥላሴ፡ወልደ፡መድኅን
• ደምስ፡ወልደ፡ዐማኑኤል
• ደስታ፡ተክለ፡ወልድ
• ደስታ፡ተክለ፡ወልድ፡(2)
• ኅሩይ፡ወልደ፡ሥላሴ
• ጥዑመ፡ልሳን፡ካሳ
• ይድነቃቸው፡ተሰማ
• ከበደ፡ተሰማ
• መኰንን፡እንዳልካቸው
• ሞገስ፡ዕቁበ፡ጊዮርጊስ
• ነቢየ፡ልዑል፡ተክለ፡ጻድቅ
• ነጋ፡ኀይለ፡ሥላሴ፡(1)
• ነጋ፡ኀይለ፡ሥላሴ፡(2)
• ዐያሌው፡ታምሩ
• ዓለማየኹ፡ሞገስ
• ዓሥራት፡ገብረ፡ማርያም
• ተሰማ፡ሀብተ፡ሚካኤል